കൊച്ചി: സിപിഎം പാർട്ടി കോൺഗ്രസ് സെമിനാറിൽ പങ്കെടുത്ത് അച്ചടക്ക ലംഘനം നടത്തിയെന്ന് കാണിച്ച് എഐസിസി നൽകിയ കാരണം കാണിക്കൽ നോട്ടീസിന് കെ.വി തോമസ് വിശദീകരണം നൽകി.എഐസിസി നേതൃത്വത്തിന് ഇ-മെയിൽ മുഖാന്തരമാണ് കെ.വി തോമസ് മറുപടി നൽകിയത്. രേഖാമൂലം നാളെ മറുപടി നൽകും.
പാർട്ടിയുടെ നിർദ്ദേശം ലംഘിച്ചതിനാൽ, നടപടിയെടുക്കാതിരിക്കാൻ വിശദീകരണം നൽകണമെന്ന് നേരത്തെ എഐസിസി കെ.വി തോമസിനോട് ആവശ്യപ്പെട്ടിരുന്നു. ഇതിന് പിന്നാലെയാണ് അദ്ദേഹം മറുപടി നൽകിയത്. അതേസമയം, നാളെ നടക്കുന്ന കെപിസിസി രാഷ്ട്രീയകാര്യ സമിതി യോഗത്തിൽ കെ.വി തോമസിന് ക്ഷണമില്ല.
തനിക്ക് പറയാനുള്ളതെല്ലാം പറഞ്ഞിട്ടുണ്ട്. നേരത്തെ പറഞ്ഞ കാര്യങ്ങൾ ക്രോഡീകരിച്ചാണ് മറുപടി നൽകിയത്. വിശദീകരണം എഐസിസി അച്ചടക്ക സമിതി പരിശോധിക്കും. അച്ചടക്ക സമിതിയുടെ റിപ്പോർട്ടിന്റെ അടിസ്ഥാനത്തിൽ കോൺഗ്രസ് അധ്യക്ഷയാണ് തീരുമാനം പറയേണ്ടത്. സിപിഎം വേദിയിൽ ആദ്യമായി പങ്കെടുക്കുന്ന കോൺഗ്രസുകാരനല്ല താൻ. ദേശീയ രാഷ്ട്രീയത്തിൽ സിപിഎമ്മിനെ കോൺഗ്രസ് ശത്രുവായി കാണേണ്ടതില്ലെന്നും മറുപടിയിലുണ്ടെന്നാണ് റിപ്പോർട്ട്.
