മലപ്പുറം: സന്തോഷ് ട്രോഫി ദേശീയ ഫുട്ബോൾ ചാമ്പ്യൻഷിപ്പിൽ കേരളത്തിന് തുടർച്ചയായ രണ്ടാം ജയം. ഇന്ന് നടന്ന മത്സരത്തിൽ എതിരില്ലാത്ത രണ്ട് ഗോളിനാണ് കേരളം ബംഗാളിനെ തോൽപ്പിച്ചത്. 84-ാം മിനിറ്റിൽ നൗഫലാണ് ആദ്യ ഗോൾ നേടിയത്. അധിക സമയത്ത് ജെസിനാണ് രണ്ടാം ഗോൾ സ്വന്തമാക്കിയത്.
മത്സരം ആദ്യ പകുതി പിന്നിട്ടപ്പോൾ ഇരു ടീമുകൾക്കും ഗോൾ നേടാനായില്ല. തുല്യ ശക്തികൾ തമ്മിലുള്ള പോരാട്ടത്തിൽ രണ്ട് ടീമുകൾക്കും നിരവധി അവസരങ്ങൾ ലഭിച്ചെങ്കിലും ഒന്നും ഗോളിലേക്കെത്തിക്കാനായില്ല. എന്നാൽ, ആവസാന നിമിഷത്തിലേയ്ക്ക് അടുത്തപ്പോഴാണ് കേരളത്തിനായി നൗഫൽ ഗോൾ നേടിയത്.
ആദ്യ ഗോൾ വീണതോടെ, ബംഗാൾ സമനില നേടാനുള്ള പരിശ്രമത്തിലായി. എന്നാൽ, ബംഗാളിനെ ശക്തമായി പ്രതിരോധിച്ച കേരളം, 90+4 മിനിറ്റിൽ അടുത്ത ഗോൾ നേടി വിജയക്കൊടി പാറിച്ചു. ഗോൾക്കീപ്പറെ കടത്തിവെട്ടിച്ച്, പന്ത് വലയ്ക്കുള്ളിലാക്കിയ ജെസിനാണ് കേരളത്തിനായി രണ്ടാം ഗോൾ നേടിയത്.
Comments