തിരുവനന്തപുരം: സിൽവർ ലൈൻ വിരുദ്ധ പ്രചാരണങ്ങൾ നേരിടാൻ പിണറായി സർക്കാർ. കെ-റെയിൽ ബോധവത്കരണത്തിന് മന്ത്രിമാർ നേരിട്ട് വീടുകളിലെത്തും. അനുകൂല പ്രചാരണങ്ങൾ ശക്തമാക്കാൻ ഡിവൈഎഫ്ഐയും രംഗത്തുണ്ട്. വീടുകയറി പ്രചാരണം നടത്തുമെന്ന് മന്ത്രി എംവി ഗോവിന്ദൻ അറിയിച്ചു. പുനരധിവാസവും നഷ്ടപരിഹാരവും ഉറപ്പായ ശേഷം ഭൂമി വിട്ടു നൽകിയാൽ മതി. ബോധവത്കരണത്തിന് തദ്ദേശ സ്ഥാപനങ്ങളേയും രംഗത്തിറക്കുമെന്ന് മന്ത്രി അറിയിച്ചു.
സിൽവർലൈനിൽ എൽഡിഎഫിന്റെ രാഷ്ട്രീയ വിശദീകരണ യോഗങ്ങൾക്ക് ഇന്ന് തുടക്കമാകും. ആദ്യയോഗം മുഖ്യമന്ത്രി പിണറായി വിജയൻ ഉദ്ഘാടനം ചെയ്യും. വരും ദിവസങ്ങളിൽ ജില്ലകൾ കേന്ദ്രീകരിച്ച് യോഗങ്ങളും കൂട്ടായ്മകളുമാണ് എൽഡിഎഫ് തീരുമാനിച്ചിരിക്കുന്നത്. ജനങ്ങളുടെ എതിർപ്പ് തുടരുന്ന പശ്ചാത്തലത്തിലാണിത്. സിപിഎം പാർട്ടി കോൺഗ്രസ് സമാപിച്ച സാഹചര്യത്തിലാണ് പ്രതിരോധ പരിപാടികൾക്ക് തുടക്കമിടുന്നത്.
