കണ്ണൂർ: മുഖ്യമന്ത്രി പിണറായി വിജയന് തീറെഴുതി കിട്ടിയതല്ല കേരളമെന്ന് കെപിസിസി പ്രസിഡന്റ് കെ. സുധാകരൻ. പോലീസ് അല്ല പട്ടാളം വന്നാലും വിട്ടു വീഴ്ച്ചയുണ്ടാകില്ല. സിൽവർ ലൈനിനായി ഒറ്റകുറ്റിയും ഇടാൻ അനുവദിക്കില്ലെന്ന് സുധാകരൻ പറഞ്ഞു. സ്ഥലത്ത് സ്ഥാപിച്ച കുറ്റികൾ സുധാകരന്റെ നേതൃത്വത്തിൽ കോൺഗ്രസ് പിഴുതുമാറ്റി. കണ്ണൂരിലെ ചാലയിൽ സംഘർഷമുണ്ടായ സ്ഥലം സന്ദർശിക്കാനെത്തിയതായിരുന്നു കെ. സുധാകരൻ.
സിൽവർ ലൈൻ കേരളത്തിൽ നടക്കില്ല. പോലീസ് നല്ല നിലയിൽ പെരുമാറിയാൽ അവർക്ക് നല്ലത്. എവിടെ കുറ്റിയിട്ടാലും പിഴുത് എറിയും. പട്ടാളം വന്നാലും കുറ്റി നിലനിർത്തില്ല. ജയിലിൽ പോകാനും പണമടയ്ക്കാനും തയ്യാറാണ്. ആർക്കും പ്രതിരോധിക്കാൻ ആകില്ലെന്നും കേരളത്തിലെ സാമൂഹിക അന്തരീക്ഷം തകർക്കാൻ അനുവദിക്കില്ലെന്നും സുധാകരൻ പറഞ്ഞു. പ്രദേശത്ത് സംഘർഷം നിലനിൽക്കുകയാണ്.
സമരക്കാരെ കായികമായി നേരിട്ടാൽ പോലീസിനെ ജനം തെരുവിൽ കൈകാര്യം ചെയ്യുമെന്നും സുധാകരൻ പറഞ്ഞു. പോലീസിന്റെ നരനായാട്ട് അവസാനിപ്പിക്കണം. ഉദ്യോഗസ്ഥർക്ക് സുരക്ഷ ഏർപ്പെടുത്തിയ പേരിൽ പോലീസ് അഴിഞ്ഞാടുകയാണ്. കോട്ടയം മാടപ്പള്ളിയിൽ സ്ത്രീകൾക്കും കുട്ടികൾക്കും നേരെ പോലീസ് നടത്തിയ അതിക്രമം ആരും മറന്നിട്ടില്ല. ജനങ്ങളെ കയ്യേറ്റം ചെയ്യാനും ചവിട്ടിമെതിക്കാനും ആരാണ് അധികാരം തന്നതെന്നും സുധാകരൻ ചോദിച്ചു.
Comments