ഹൈദരാബാദ്: കോൺഗ്രസിനെ തുടർച്ചയായ വീഴ്ചകളിൽ നിന്ന് ഉയിർത്തെഴുന്നേൽപിക്കാൻ ഒരുങ്ങുന്ന രാഷ്ട്രീയ തന്ത്രജ്ഞൻ പ്രശാന്ത് കിഷോറിന് മുന്നറിയിപ്പ് നൽകി ടിആർഎസ് നേതാവും തെലങ്കാന മന്ത്രിയുമായ കെടി രാമറാവു. പ്രശാന്ത് കിഷോറിന്റെ സംവിധാനത്തിനൊപ്പം ചേർന്നെങ്കിലും കോൺഗ്രസിൽ പ്രതീക്ഷ നശിച്ചെന്ന് അദ്ദേഹം പറഞ്ഞു.
ദേശീയ തലത്തിൽ ബിജെപിക്കെതിരെ വിശാല സഖ്യം രൂപീകരിക്കുന്നതിനായി പ്രശാന്ത് കിഷോർ മുന്നോട്ടുവെച്ച നിർദ്ദേശങ്ങളോട് പ്രതികരിക്കുകയായിരുന്നു കെടിആർ. കോൺഗ്രസ് കാലാവധി കഴിഞ്ഞ ഉത്പ്പന്നമാണ്. തീർത്തും അവശരും ദുർബലരും ഒപ്പം രോഗബാധിതരുമാണവർ. ഇനി രക്ഷപെടില്ല. എന്തൊക്കെപ്പറഞ്ഞാലും പ്രശാന്ത് കിഷോർ കോൺഗ്രസിലേക്ക് പോകുന്നത് വലിയ അബദ്ധമാണെന്നും കെടിആർ തുറന്നടിച്ചു.
തെലങ്കാന നിയമസഭാ തിരഞ്ഞെടുപ്പ് അടുത്തവർഷം നടക്കാനിരിക്കേ തെലങ്കാന രാഷ്ട്ര സമിതി (ടിആർഎസ്) പ്രചാരണ തന്ത്രം ആവിഷ്ക്കരിക്കാൻ പ്രശാന്ത് കിഷോറിന്റെ ഐ-പാക്കുമായി ധാരണയിലെത്തിയിരുന്നു. ഇതുമായി ബന്ധപ്പെട്ട കരാർ ഒപ്പുവെച്ച് മണിക്കൂറുകൾക്കകമാണ് കെടിആർ പ്രശാന്ത് കിഷോറിന് മുന്നറിയിപ്പ് നൽകിയത്. പ്രശാന്ത് കിഷോർ ഏതെങ്കിലും പാർട്ടിയിൽ ചേരുന്നത് അദ്ദേഹത്തിന്റെ സ്വന്തം താൽപ്പര്യമാണ്. തങ്ങൾക്കിടയിൽ മറ്റ് വിയോജിപ്പുകളില്ലെന്നും കെടിആർ പറഞ്ഞു.
Comments