തിരുവനന്തപുരം: വിലക്ക് മറികടന്ന് സിപിഎം പാർട്ടി കോൺഗ്രസ് സെമിനാറിൽ പങ്കെടുത്ത കെവി തോമസിനെതിരായ എഐസിസി നടപടിയിൽ തൃപ്തനെന്ന് കെപിസിസി അദ്ധ്യക്ഷൻ കെ സുധാകരൻ. കെവി തോമസിനെ പാർട്ടിയിൽ നിന്ന് പുറത്താക്കണമെന്ന് ആവശ്യപ്പെട്ടിട്ടില്ലെന്നും നടപടി വേണമെന്ന് മാത്രമാണ് പറഞ്ഞതെന്നും അദ്ദേഹം പറഞ്ഞു.എഐസിസിയുടെ നടപടി അംഗീകരിക്കുകയാണ് വ്യക്തിപരമായി സംതൃപ്തിയുണ്ടോയെന്ന് സ്വകാര്യമായി പറയാം എന്നും അദ്ദേഹം കൂട്ടിച്ചേർത്തു.
കെവി തോമസിന്റെ ഭാവി അദ്ദേഹത്തിന് തീരുമാനിക്കാം.സ്വന്തം തോണി ഏതു കരയിൽ അടുപ്പിക്കണമെന്നതു തീരുമാനിക്കേണ്ടത് കെവി തോമസാണ്. അദ്ദേഹമാണ് ആ വഞ്ചിയുടെ കപ്പിത്താൻ.എങ്ങോട്ട് പോകണമെന്നും എങ്ങോട്ടു തുഴയണമെന്നും അദ്ദേഹത്തിന് തന്നെ തീരുമാനിക്കാമെന്നും അദ്ദേഹം കൂട്ടിച്ചേർത്തു.
അതേസമയം രാഷ്ട്രീയ അഭയം തരാമെന്ന കോടിയേരിയുടെ വാഗ്ദാനത്തെ തഴഞ്ഞ് കെവി തോമസ് രംഗത്തെത്തിയിരുന്നു. വീടില്ലാത്തവർക്കാണ് അഭയം വേണ്ടതെന്നും കോൺഗ്രസ് എന്ന വീട്ടിലാണ് ഇപ്പോഴുമുള്ളതെന്നുമായിരുന്നു അദ്ദേഹത്തിന്റെ മറുപടി. കോൺഗ്രസിൽ പദവികളില്ലെങ്കിലും സാരമില്ല, പദവികളെന്ന് പറയുന്നത് കസേരയും മേശയുമാണ്. അതുമാറ്റി സ്റ്റൂള് തന്നാലും കുഴപ്പമില്ലെന്നും കെ വി തോമസ് പറഞ്ഞിരുന്നു.
Comments