കൊല്ലം ; പോസ്റ്റോഫീസിലേക്ക് എത്തിയ പാഴ്സലിൽ ബ്രൗൺഷുഗർ. കൊല്ലം പട്ടത്താനത്താണ് സംഭവം. സംശയം തോന്നി പോസ്റ്റ് ഓഫീസ് ജീവനക്കാർ പരിശോധിച്ചപ്പോഴാണ് ബ്രൗൺഷുഗർ ആണെന്ന് തിരിച്ചറിഞ്ഞത്.
ഇൻഡോറിൽ നിന്നും ആണ് പാഴ്സൽ അയച്ചിരിക്കുന്നത്. റഫീക്ക് ജേക്കബ് മൈത്രി നഗർ അമ്മൻനട പട്ടത്താനം എന്ന വിലാസത്തിലേക്കാണ് പാഴ്സൽ വന്നത്. പലതവണ ഈ വിലാസത്തിലേക്ക് ഇൻഡോറിൽ നിന്ന് പാഴ്സൽ വന്നിരുന്നതായും കണ്ടെത്തിയിട്ടുണ്ട്. എക്സൈസ് ഉദ്യോഗസ്ഥർ പോസ്റ്റ് ഓഫീസിലെത്തി പരിശോധന നടത്തി.
കൊറോണ കാലത്താണ് പാഴ്സൽ വഴി അന്യസംസ്ഥാനങ്ങളിൽ നിന്ന് മയക്കുമരുന്ന് കേരളത്തിലേക്ക് എത്തുന്നത് വർദ്ധിച്ചത്. ഇതിനായി ഇൻസ്റ്റ്ഗ്രാം ഗ്രൂപ്പുകളും പ്രവർത്തിക്കുന്നുണ്ടെന്നാണ് വിവരം. ആവശ്യമുളള മയക്കുമരുന്നിന്റെ പേര് അയച്ചുകൊടുത്താൽ നിശ്ചിത ദിവസത്തിനുള്ളിൽ ഇവർ പറഞ്ഞ മേൽവിലാസത്തിലേക്ക് അയയ്ക്കും. സൈബറിടങ്ങൾ വഴി മയക്കുമരുന്ന് മാഫിയ പ്രവർത്തിക്കുന്നു എന്നതിന്റെ വ്യക്തമായ ഉദാഹരണം കൂടിയാണ് പാഴ്സൽ വഴി ഇത് അയയ്ക്കുന്ന സംഭവം. നേരത്തെയും ഇത്തരത്തിലുള്ള സംഭവങ്ങൾ കണ്ടെത്തിയിരുന്നു.
