കാലിഫോർണിയ: ലോകോത്തര നിലവാരത്തിലുള്ള ക്രിക്കറ്റ് സ്റ്റേഡിയം ലോസ് ഏഞ്ചൽസിൽ നിർമ്മിക്കാനൊരുങ്ങി ബോളിവുഡ് താരം ഷാരുഖ് ഖാൻ. ഇതിനായി യുഎസ് എംഎൽസിയുമായി സഹകരിക്കുമെന്ന് ഷാരൂഖ് ഖാൻ അറിയിച്ചു. ലോകത്തിലെ ഏറ്റവും പ്രശസ്തമായ മെട്രോപൊളിറ്റൻ സ്ഥലങ്ങളിലൊന്നായ ലോസ് ഏഞ്ചൽസിൽ സ്റ്റേഡിയം നിർമ്മിക്കുന്നതിലൂടെ ക്രിക്കറ്റിന് പുതിയ മാറ്റങ്ങൾ കൊണ്ടുവരാൻ സാധിക്കുമെന്ന് ഷാരൂഖ് ഖാൻ പ്രസ്താവനയിൽ അറിയിച്ചു.
ഷാരൂഖിന്റെ ഉടമസ്ഥതയിലുളള ഐപിഎൽ ടീമായ കൊൽക്കത്ത നൈറ്റ് റൈഡേഴ്സിന്റെ പേരിലാണ് സ്റ്റേഡിയം നിർമ്മിക്കുന്നത്. യുഎസിലെ മേജർ ലീഗ് ക്രിക്കറ്റുമായി കൈകോർത്താണ് പദ്ധതി നടപ്പാക്കുക. മേജർ ലീഗ് ക്രിക്കറ്റിന്റെ അമേരിക്കയിലെ ഭാവി മുന്നിൽ കണ്ടാണ് നിക്ഷേപമിറക്കുന്നതെന്ന് കൊൽക്കത്ത നൈറ്റ് റൈഡേഴ്സ് പ്രസ്താവനയിൽ അറിയിച്ചു.
ഒരേ സമയം 10,000 പേരെ ഉൾക്കൊള്ളിക്കാൻ സാധിക്കുന്ന തരത്തിലായിരിക്കും സ്റ്റേഡിയത്തിന്റെ നിർമ്മാണം. ഇൻവിർ നഗരത്തിൽ 15 ഏക്കർ സ്ഥലത്താണ് സ്റ്റേഡിയം നിർമ്മിക്കുന്നത്. യുഎസ് ക്രിക്കറ്റിന്റെ ഭാവിയിലുള്ള വിശ്വാസത്തെ അടിസ്ഥാനമാക്കിയാണ് എംഎൽസിയിൽ നിക്ഷേപിക്കാൻ തീരുമാനിച്ചതെന്ന് ഷാരൂഖ് ഖാൻ അറിയിച്ചു. ഷാരൂഖ് ഖാൻ, നടി ജൂഹി ചൗള, ഭർത്താവ് ജയ് മേത്ത എന്നിവരുടെ ഉടമസ്ഥതയിലുള്ള കെആർജിയാണ് കരാറിൽ ഒപ്പിട്ടത്.
സ്റ്റേഡിയത്തിൽ അത്യാധുനിക പരിശീലന സൗകര്യങ്ങൾ, ലോക്കർ റൂമുകൾ, ലക്ഷ്വറി സ്യൂട്ടുകൾ, പ്രത്യേക പാർക്കിംഗ് സെന്ററുകൾ, ഫീൽഡ് ലൈറ്റിംഗ്, അന്താരാഷ്ട്ര നിലവാരത്തിലുള്ള പിച്ച് എന്നിവ ഉൾപ്പെടുത്തും. ഇന്റർനാഷണൽ ക്രിക്കറ്റ് കൗൺസിലിന്റെ അക്രഡിറ്റേഷൻ നേടുന്നതിനും അന്താരാഷ്ട്ര ക്രിക്കറ്റിന് ആതിഥേയത്വം വഹിക്കുന്നതിന് വേദി പ്രാപ്തമാക്കുന്നതിനുമാണിത്.
2028ൽ ലോസ് ഏഞ്ചൽസിൽ നടക്കുന്ന ഒളിമ്പിക്സിൽ ക്രിക്കറ്റിനെ കൂടി ഉൾപ്പെടുത്താൻ ഐസിസി ആവശ്യപ്പെട്ടിരുന്നു. ആവശ്യം അംഗീകരിച്ചാൽ ഗ്രേറ്റ് പാർക്കിലെ സ്റ്റേഡിയം ക്രിക്കറ്റിന്റെ പ്രധാന വേദിയാകും.
