തിരുവനന്തപുരം: കേരളത്തിൽ നിന്നുള്ള മികച്ച ബോക്സർമാർക്ക് തന്റെ അക്കാദമിയിൽ സൗജന്യ പരിശീലനം ലഭ്യമാക്കുമെന്ന് ബോക്സിംഗ് താരം മേരി കോം. കേരള ഒളിമ്പിക്സ് അസോസിയേഷൻ സംഘടിപ്പിച്ച ചടങ്ങിൽ സംസാരിക്കുകയായിരുന്നു അവർ.
കേരളത്തിൽ നിന്നും നിരവധി ബോക്സർമാർ ഉണ്ടായിട്ടുണ്ട്. എന്നാലിന്ന്, കേരളത്തിൽ നിന്ന് അന്താരാഷ്ട്ര തലത്തിലേക്ക് എത്തുന്ന ബോക്സർമാർ ഉയർന്നുവരുന്നില്ല. ഇവിടെ നിന്നും കഴിവുറ്റ യുവ ബോക്സർമാർ വരുമ്പോൾ അക്കാദമിയിൽ സൗജന്യ പരിശീലനം നൽകും. രാജ്യാന്തര കായിക താരങ്ങളെ വളർത്തിയെടുക്കാൻ കേരള ഒളിമ്പിക്സ് അസോസിയേഷൻ പോലുള്ള സംഘടനകൾ മുൻകൈയെടുക്കണമെന്നും മേരി കോം പറഞ്ഞു.
ഒളിമ്പിക്സിൽ സ്വർണമെഡൽ നേടുക എന്ന ലക്ഷ്യം മാത്രമാണ് അവശേഷിക്കുന്ന ആഗ്രഹമെന്നും ഇംഗ്ലണ്ടിൽ വെച്ച് ജൂലൈയിൽ ആരംഭിക്കുന്ന കോമൺവെൽത്ത് ഗെയിംസിലേക്കാണ് താനിപ്പോൾ ശ്രദ്ധ കേന്ദ്രീകരിക്കുന്നതെന്നും മേരി കോം കൂട്ടിച്ചേർത്തു.
കേരള ഒളിമ്പിക് അസോസിയേഷന്റെ നേതൃത്വത്തിൽ സംഘടിപ്പിക്കുന്ന കേരള ഗെയിംസ് 2022ന് മേരി കോം അടക്കമുള്ള രാജ്യത്തിന്റെ അഭിമാന കായിക താരങ്ങളുടെ സാന്നിധ്യത്തിലാണ് കഴിഞ്ഞ ദിവസം തുടക്കമിട്ടത്. പി.ആർ ശ്രീജേഷും രവികുമാർ ദഹിയയും ബജ്രംഗ് പൂനിയയും ചടങ്ങിൽ പങ്കെടുത്തു. തിരുവനന്തപുരം യൂണിവേഴ്സിറ്റി സ്റ്റേഡിയത്തിൽ സംഘടിപ്പിച്ച ചടങ്ങിൽ കായിക മന്ത്രി വി.അബ്ദുറഹ്മാനാണ് ഗെയിംസ് ഉദ്ഘാടനം ചെയ്തത്.
