ഡെറാഡൂണ്‍: ഉത്തരാഖണ്ഡിലെ എല്ലാ സ്‌കൂളുകളിലും വേദങ്ങളും രാമായണവും ഗീതയും പഠിപ്പിക്കണമെന്ന് വിദ്യാഭ്യാസ മന്ത്രി ധന്‍ സിങ് റാവത്ത്. സംസ്ഥാനത്തിന്റെ ചരിത്രവും ഭൂമിശാസ്ത്രവും എല്ലാം വിദ്യാര്‍ത്ഥികളെ പഠിപ്പിക്കുമെന്നും അദ്ദേഹം വ്യക്തമാക്കി.
പുതിയ വിദ്യാഭ്യാസ നയം അനുസരിച്ച് ഇന്ത്യയുടെ ചരിത്രത്തേയും പാരമ്പര്യത്തേയും അടിസ്ഥാനമാക്കിയാണ് വിദ്യാര്‍ത്ഥികളുടെ സിലബസ് തയ്യാറാക്കേണ്ടത്. വേദപുരാണങ്ങളും ഗീതയും വിദ്യാര്‍ത്ഥികളെ പഠിപ്പിക്കണം. അതോടൊപ്പം തന്നെ പ്രാദേശികമായ ഭാഷകള്‍ക്കും പ്രോത്സാഹനം നല്‍കണം.
പുതിയ വിദ്യാഭ്യാസനയം നടപ്പാക്കുന്ന രാജ്യത്തെ ആദ്യത്തെ സംസ്ഥാനം ഉത്തരാഖണ്ഡ് ആയിരിക്കും. ഇതിനായി പുതിയ സിലബസ് ഉടന്‍ തയ്യാറാക്കും. ഇതിനെക്കുറിച്ചുള്ള വിശദവിവരങ്ങള്‍ മന്ത്രിസഭായോഗത്തില്‍ വ്യക്തമാക്കും. ഉത്തരാഖണ്ഡിന്റെ ചരിത്രം, സംസ്ഥാനത്തെ മഹത് വ്യക്തിത്വങ്ങള്‍ തുടങ്ങിയവരെക്കുറിച്ചും സിലബസില്‍ ഉള്‍പ്പെടുത്തുമെന്നും അദ്ദേഹം പറഞ്ഞു.
