കോട്ടയം : പഞ്ചായത്ത് ഓഫീസിലേക്ക് അപേക്ഷ കൊടുക്കാനോ പരാതി പറയാനോ എത്തുന്നവരെ സ്വീകരക്കാൻ നിൽക്കുന്നത് മൂർഖൻ പാമ്പുകൾ. കേൾക്കുമ്പോൾ തന്നെ പേടി തോന്നുന്നുണ്ടല്ലേ ? എന്നാൽ ഇത് നടന്ന സംഭവമാണ്. കോട്ടയം ജില്ലയിലെ തലപ്പലം പഞ്ചായത്ത് ഓഫീസിൽ ആളുകൾ എത്തിയപ്പോൾ കണ്ടത് എന്തിനുമൊരുങ്ങി നിൽക്കുന്ന രണ്ട് വലിയ മൂർഖൻ പാമ്പുകളെയാണ്.
കഴിഞ്ഞ ദിവസം ഉച്ചയ്ക്ക് പന്ത്രണ്ടരയോടെയായിരുന്നു സംഭവം. ഓഫീസ് ജീവനക്കാർ തന്നെയാണ് ആദ്യം പാമ്പിനെ കണ്ടത്. ജീവനക്കാരനായ ജോജോ തോമസ് അപേക്ഷകൾ കൈമാറാൻ പോയി തിരിച്ചെത്തിയപ്പോഴാണ് മൂർഖൻ പാമ്പുകൾ ഓഫീസിനുള്ളിലൂടെ ഇഴഞ്ഞ് പോകുന്നത് കണ്ടത്. ഇത് കണ്ട് പേടിച്ച ഇയാൾ മറ്റ് ജീവനക്കാരെയും വിവരം അറിയിച്ചു. തുടർന്ന് പാമ്പ് പിടുത്തക്കാരനായ തലപ്പലം സ്വദേശി ഇടത്തിൽ ജോബിയെ വിളിച്ച് വരുത്തി പാമ്പിനെ പിടികൂടുകയായിരുന്നു.
വനം വകുപ്പിനെ വിവരമറിയിച്ചിട്ടുണ്ടെന്ന് പഞ്ചായത്ത് പ്രസിഡന്റ് വ്യക്തമാക്കി. എന്നാൽ ഇത്രയും തിരക്കുളള ഓഫീസിൽ പാമ്പുകൾ എങ്ങനെ കടന്നുകൂടിയെന്ന് ഇനിയും കണ്ടെത്താനായിട്ടില്ല.
