മുംബൈ : സംസ്ഥാനത്തെ മദ്രസകളിൽ ദേശീയ ഗാനം നിർബന്ധമാക്കണമെന്ന ആവശ്യവുമായി മഹാരാഷ്‌ട്ര ബിജെപി. പഠനവിഷയം മതമാണെങ്കിലും ദേശത്തെക്കുറിച്ച് അറിഞ്ഞിരിക്കേണ്ടത് അത്യാവശ്യമാണെന്ന് ബിജെപി സ്പിരിച്വൽ കോർഡിനേഷൻ സെൽ മഹാരാഷ്‌ട്ര അദ്ധ്യക്ഷൻ ആചാര്യ തുഷാർ ഭോസ്ലേ പറഞ്ഞു. സംസ്ഥാനത്തെ മദ്രസകളിൽ ദേശീയഗാനം നിർബന്ധമാക്കി ഉത്തർപ്രദേശ് സർക്കാർ ഉത്തരവ് പുറപ്പെടുവിച്ചിരുന്നു. ഇതിന് പിന്നാലെയാണ് മഹാരാഷ്ട്രയിലും മദ്രസകളിൽ ദേശീയ ഗാനം ആലപിക്കണമെന്ന ആവശ്യം ഉയരുന്നത്.
പഠിപ്പിക്കുന്നത് മതമാണെങ്കിലും അല്ലെങ്കിലും രാജ്യത്തെക്കുറിച്ച് അറിഞ്ഞിരിക്കുക എന്നത് പ്രധാനപ്പെട്ടതാണ്. ഉത്തർപ്രദേശിലെ മദ്രസകളിൽ ദേശീയ ഗാനം നിർബന്ധമാക്കിയ യോഗി സർക്കാരിന്റെ തീരുമാനം സ്വാഗതാർഹമാണ്. ഉത്തർപ്രദേശിനെ മാതൃകയാക്കി മഹാരാഷ്‌ട്രയും മദ്രസകളിൽ ദേശീയ ഗാനം നിർബന്ധമാക്കണമെന്നും തുഷാർ ഭോസ്ലേ ആവശ്യപ്പെട്ടു.
കഴിഞ്ഞ ദിവസമാണ് ഉത്തർപ്രദേശിലെ മദ്രസകളിൽ ദേശീയ ഗാനം നിർബന്ധമാക്കിയത്. സർക്കാർ- സർക്കാർ ഇതര മദ്രസകൾക്കും ഈ ഉത്തരവ് ബാധകമാണ്. ക്ലാസുകൾ തുടങ്ങുന്നതിന് മുൻപ് ദേശീയ ഗാനം ആലപിക്കണമെന്നാണ് സർക്കാർ നിർദ്ദേശം.
