ജയ്പൂർ : ബിജെപി ത്രിദിന ഉന്നത തല യോഗം ഇന്ന് ആരംഭിക്കും. രാജസ്ഥാനിലെ ജയ്പൂരിൽ വെച്ചാണ് രാജ്യമെമ്പാടുമുള്ള നേതാക്കൾ പങ്കെടുക്കുന്ന യോഗം സംഘടിപ്പിക്കുന്നത്. യോഗത്തിൽ ബിജെപി ദേശീയ അദ്ധ്യക്ഷൻ ജെപി നദ്ദ, കേന്ദ്ര ആഭ്യന്തര മന്ത്രി അമിത് ഷാ, കേന്ദ്ര പ്രതിരോധ മന്ത്രി രാജ്നാഥ് സിംഗ്, കേന്ദ്ര ഗതാഗത മന്ത്രി നിതിൻ ഗഡ്കരി എന്നിവരും പങ്കെടുക്കും. പ്രധാനമന്ത്രി നരേന്ദ്ര മോദി യോഗത്തിൽ വെർച്വലായി പങ്കെടുക്കുമെന്നാണ് ഉന്നത വൃത്തങ്ങൾ അറിയിക്കുന്നത്.
നിയമസഭാ തിരഞ്ഞെടുപ്പുകൾക്ക് മുന്നോടിയായി സംഘടനയെ കൂടുതൽ ശക്തിപ്പെടുത്തുക എന്ന ലക്ഷ്യത്തോടെയാണ് യോഗം സംഘടിപ്പിക്കുന്നത്. ഇന്ന് ഉച്ചയ്ക്ക് രണ്ട് മണിയോടെ ജയ്പൂരിൽ എത്തുന്ന നദ്ദ വൈകീട്ട് ആറ് മണിയ്ക്ക് പാർട്ടി ജനറൽ സെക്രട്ടറിമാരുമായി കൂടിക്കാഴ്ച നടത്തും. നാളെ സംസ്ഥാന ഓർഗനൈസിംഗ് സെക്രട്ടറിമാരുമായുള്ള യോഗത്തിൽ അദ്ദേഹം പങ്കെടുക്കും. മേയ് 21 ന് സംസ്ഥാന പ്രസിഡന്റുമാർ, പാർട്ടി ഭാരവാഹികൾ, സംഘടനാ സെക്രട്ടറി, സംസ്ഥാന നേതാക്കൾ എന്നിവരുമായുള്ള സംയുക്ത യോഗവും നടക്കും.
വരുന്ന നിയമസഭാ തിരഞ്ഞെടുപ്പുകളിൽ മികച്ച വിജയം നേടുന്നതിനുള്ള റോഡ് മാപ്പ് ഈ യോഗത്തിൽ തയ്യാറാക്കും. മദ്ധ്യപ്രദേശ്, ചത്തീസ്ഗഡ്, രാജസ്ഥാൻ, ഗുജറാത്ത്, ഹിമാചൽ പ്രദേശ്, കർണാടക എന്നീ സംസ്ഥാനങ്ങളിലാണ് ഈ വർഷം നിയമസഭാ തിരഞ്ഞെടുപ്പ് നടക്കുന്നത്. 2024 ലെ ലോക് സഭാ തിരഞ്ഞെടുപ്പിനുള്ള തയ്യാറെടുപ്പും നടക്കും.
Comments