ഛണ്ഡീഗഡ്: ഹരിയാനയിൽ മുതിർന്ന കോൺഗ്രസ് നേതാവ് കുൽദീപ് ബിഷ്ണോയ് ബിജെപിയിൽ ചേരുമെന്ന് സൂചന. മുഖ്യമന്ത്രി മനോഹർ ലാൽ ഖട്ടാറുമായി അദ്ദേഹം നടത്തിയ കൂടിക്കാഴ്ചയാണ് ബിജെപി പ്രവേശനം സംബന്ധിച്ച സൂചനകൾ നൽകുന്നത്. കഴിഞ്ഞ ഏതാനും നാളുകളായി നേതൃത്വവുമായി കലഹത്തിലാണ് കുൽദീപ് ബിഷ്ണോയ്.
കഴിഞ്ഞ ദിവസം വൈകീട്ടോടെയായിരുന്നു അദ്ദേഹം മുഖ്യമന്ത്രിയുടെ ഔദ്യോഗിക വസതിയിൽ എത്തി ഖട്ടാറിനെ കണ്ടത്. തുടർന്ന് ഖട്ടാറിനൊപ്പം എടുത്ത ചിത്രങ്ങൾ അദ്ദേഹം ട്വിറ്ററിൽ പങ്കുവെച്ചിരുന്നു. ഇതോടെയാണ് കൂടിക്കാഴ്ചയുടെ വിവരം പുറത്തുവന്നത്. രാഷ്ട്രീയമാണ് മനോഹർ ലാൽ ഖട്ടാറുമായി ചർച്ച ചെയ്തത് എന്ന് ബിഷ്ണോയ് അറിയിച്ചു.
സംസ്ഥാന അദ്ധ്യക്ഷ പദവിയിലേക്ക് എത്തുന്നതിൽ നിന്നും ബിഷ്ണോയെ കോൺഗ്രസ് നേതൃത്വം കഴഞ്ഞിരുന്നു. ഇതോടെയാണ് പാർട്ടിയും അദ്ദേഹവും തമ്മിൽ തർക്കങ്ങൾ ആരംഭിച്ചത്. കഴിഞ്ഞ മാസമായിരുന്നു ബിഷ്ണോയെ തഴഞ്ഞ് അദ്ധ്യക്ഷനായി ഭൂപീന്ദർ സിംഗ് ഹൂഡയുടെ അനുയായി ഉദയ് ഭാനെ നിയമിച്ചത്. 53 കാരനായ ബിഷ്ണോയ് മുൻ ഹരിയാന മുഖ്യമന്ത്രി ഭജൻ ലാലിന്റെ മകനാണ്.
