ഹാക്കർമാർ അയക്കുന്ന ലിങ്കുകളെക്കുറിച്ച് ജാഗരൂകരായിരിക്കണമെന്ന മുന്നറിയിപ്പുമായി കേരള പോലീസ്. ഫേസ്ബുക്കിലൂടെയാണ് കേരളാ പോലീസ് മുന്നറിയിപ്പ് പോസ്റ്റ് പങ്കുവെച്ചത്.
”ഹാക്കർമാർ ചില ലിങ്കുകൾ അയച്ചേക്കാം. ശേഷം ആ ലിങ്ക് സന്ദർശിച്ചാൽ കിട്ടുന്ന വിഡിയോയിൽ നിങ്ങളാണെന്നും അല്ലെങ്കിൽ, നിങ്ങളെ പോലെയിരിക്കുന്നയാളെ കാണാൻ കഴിയുമെന്നും പറയുന്നു. തുടർന്ന് അത്തരം ലിങ്കുകൾ ക്ലിക് ചെയ്തു നോക്കാൻ നിർദേശിക്കുന്നു.
സന്ദേശം ശരിയാണോ അല്ലയോ എന്നറിയാൻ വേണ്ടിയോ പേടി മൂലമോ ചിലരെങ്കിലും ഈ ലിങ്കുകളിൽ ക്ലിക്ക് ചെയ്യാറുണ്ട്. ഓർക്കുക, ഇത്തരം ലിങ്കുകൾ തട്ടിപ്പുകാരുടെ കെണികളാണ്.
കാഴ്ചയിൽ ഒറിജിനൽ സൈറ്റുകളെ വെല്ലുന്ന വിധമുള്ള ലിങ്കുകളാണ് എസ്.എം.എസ്, ഇ-മെയിൽ, മെസഞ്ചർ തുടങ്ങിയവ വഴി തട്ടിപ്പുകാർ പ്രചരിപ്പിക്കുക. ഒറ്റനോട്ടത്തിൽ സംശയിക്കപ്പെടാൻ സാധ്യത ഇല്ലാത്ത ഇത്തരം ലിങ്കുകളിൽ ക്ലിക്ക് ചെയ്ത് ഉപയോക്താക്കൾ തങ്ങളുടെ സ്വകാര്യ വിവരങ്ങൾ നൽകുന്നതിലൂടെ അവ കൈവശപ്പെടുത്തി പണം തട്ടിയെടുക്കുന്നു.
ഭീഷണിപ്പെടുത്തുക, സമ്മർദ്ദം ചെലുത്തുക തുടങ്ങിയവയും ഇവരുടെ രീതികളാണ്. ഓർമ്മിക്കുക, അപരിചിത മൊബൈൽ നമ്പറുകളിൽ നിന്നോ വാട്ട്സാപ്പ്, എസ്.എം.എസ്, ഇ-മെയിലൂടെയോ ലഭിക്കുന്ന ലിങ്കുകളിൽ ക്ലിക്ക് ചെയ്യരുത്.”
Comments