എറണാകുളം: സ്മാർട്ട് ഫോണില്ലാത്ത ആരാധികയ്ക്ക് ഫോട്ടോ ഫ്രെയിം ചെയ്ത് നൽകി നടൻ ജയസൂര്യ. പനമ്പള്ളി നഗറിലെ ടോണി ആൻഡ് ഗൈ എന്ന സ്ഥാപനത്തിലെ ജീവനക്കാരിയായ പുഷ്പയ്‌ക്കാണ് ജയസൂര്യ സമ്മാനം നൽകിയത്. ഇതിന്റെ വീഡിയോ ദൃശ്യങ്ങൾ വ്യാപകമായി പ്രചരിക്കുന്നുണ്ട്.
ടോണി ആൻഡ് ഗൈ എന്ന സ്ഥാപനം ഔദ്യോഗിക ഇൻസ്റ്റഗ്രാം പേജിലൂടെയാണ് ഇക്കാര്യം പുറത്തുവിട്ടത്. കഴിഞ്ഞ ദിവസം ജയസൂര്യ സ്ഥാപനത്തിൽ എത്തിയിരുന്നു. ജയസൂര്യ എത്തുന്നത് അറിഞ്ഞ് വലിയ സന്തോഷമായിരുന്നു പുഷ്പയ്‌ക്ക് ഉണ്ടായിരുന്നത്. ആദ്യമായി നടനെ നേരിട്ട് കാണുന്നതിന്റെ ആകാംക്ഷയും പുഷ്പയ്‌ക്കുണ്ടായിരുന്നു.
നേരിട്ട് ഒന്നു കാണണം എന്ന് മാത്രമായിരുന്നു പുഷ്പയുടെ മനസ്സിലെ ആഗ്രഹം. എന്നാൽ തന്റെ ആരാധികയ്‌ക്കൊപ്പം ജയസൂര്യ ഒരു സെൽഫിയും എടുത്തു. എന്നാൽ വലിയ നടനൊപ്പം എടുത്ത സെൽഫി മക്കളെയോ ഭർത്താവിനോയോ കാണിക്കാൻ പുഷ്പയ്‌ക്ക് സ്മാർട്ട്‌ഫോൺ ഉണ്ടായിരുന്നില്ല. തുടർന്ന് പുഷ്പ പോലും അറിയാതെ ചിത്രം ഫ്രെയിം ചെയ്ത് കൊണ്ടുവരാൻ ജയസൂര്യ അസിസ്റ്റന്റിനോട് നിർദ്ദേശിക്കുകയായിരുന്നു. നിമിഷങ്ങൾകൊണ്ടുതന്നെ ഫോട്ടോ തയ്യാർ. തുടർന്ന് ഫോട്ടോ പുഷ്പയ്‌ക്ക് കൈമാറുകയായിരുന്നു.
