കൊച്ചി ; ആക്രമിക്കപ്പെട്ട കേസിലെ നടി നാളെ മുഖ്യമന്ത്രി പിണറായി വിജയനെ കാണും. രാവിലെ പത്ത് മണിയോടെ സെക്രട്ടേറിയറ്റിൽ വെച്ചാണ് കൂടിക്കാഴ്ച നടക്കുക. തുടരന്വേഷണത്തിലെ ആശങ്ക നടി മുഖ്യമന്ത്രിയെ അറിയിക്കും. പരാതിയെ രാഷ്ട്രീയപരമായി സമീപിക്കുന്നതിനെതിരെയും പരാതിപ്പെടുമെന്നാണ് റിപ്പോർട്ട്.
കേസിൽ സർക്കാരിന്റെ ബന്ധത്തിനെതിരെ നടി നൽകിയ പരാതി വിവാദമായിരിക്കെയാണ് നിർണായക കൂടിക്കാഴ്ച. കേസിന്റെ അന്വേഷണം സർക്കാർ അട്ടിമറിച്ചെന്ന് ആരോപിച്ച് ആക്രമിക്കപ്പെട്ട നടി ഹൈക്കോടതിയിൽ ഹർജി നൽകിയിരുന്നു. കേസിലെ പ്രതിയായ ദിലീപിന് ഉന്നത രാഷ്ട്രീയ നേതാക്കളുടെ സഹായം ലഭിക്കുന്നുവെന്നും ആരോപണം ഉണ്ടായിരുന്നു. ഇതിന് പിന്നാലെ നടിയെ സിപിഎം നേതാക്കൾ കൂട്ടത്തോടെ ആക്രമിക്കുകയായിരുന്നു. തുടർന്ന് സർക്കാർ അതിജീവിതയ്ക്കൊപ്പമാണെന്നും നീതി ഉറപ്പാക്കുമെന്നും അറിയിച്ചുകൊണ്ട് മുഖ്യമന്ത്രിയും രംഗത്തെത്തി.
കേസ് അട്ടിമറിക്കാനുള്ള നീക്കം നടക്കുന്നുണ്ടെന്നും നീതി ഉറപ്പാക്കാനുള്ള ഇടപെടൽ കോടതിയുടെ ഭാഗത്ത് നിന്നുമുണ്ടാകണമെന്നും വ്യക്തമാക്കിയാണ് ആക്രമിക്കപ്പെട്ട നടി ഹർജി നൽകിയിരിക്കുന്നത്. അതേസമയം, അന്വേഷണം നടക്കുന്നില്ലെന്ന നടിയുടെ ഭീതി അനാവശ്യമാണെന്ന് ഡയറക്ടർ ജനറൽ ഒഫ് പ്രോസിക്യൂട്ടർ കോടതിയിൽ വാദിച്ചു.
