സെൻട്രൽ വിസ്ത അവന്യൂ നവീകരണ പദ്ധതി വരുന്ന 10-15 ദിവസങ്ങൾക്കുള്ളിൽ പൂർത്തിയാകുമെന്ന് നഗര ഭവനകാര്യ മന്ത്രാലയത്തിലെ ഉദ്യോഗസ്ഥർ പറഞ്ഞു. രാഷ്‌ട്രപതി ഭവനിൽ നിന്ന് ഇന്ത്യാ ഗേറ്റ് വരെ രാജ്പഥിന് കുറുകെ വ്യാപിച്ചുകിടക്കുന്ന 3 കിലോമീറ്റർ പ്രദേശത്തെ 86 ഏക്കർ ഭൂമിയുടെ പൂർണ്ണമായ നവീകരണമാണ് അവന്യൂവിൽ ഉൾപ്പെടുന്നത്. മറ്റ് പ്രധാനപ്പെട്ട സർക്കാർ സ്ഥാപനങ്ങൾക്കൊപ്പം ഒരു ത്രികോണ പാർലമെന്റ് കെട്ടിടം സ്ഥാപിക്കുന്നതും ഇതിൽ ഉൾപ്പെടുന്നു. ഇന്ത്യ 75ാം സ്വാതന്ത്ര്യദിനം ആഘോഷിക്കുന്ന 2022 ഓഗസ്റ്റിൽ പദ്ധതി പൂർത്തീകരിക്കാനാണ് ലക്ഷ്യമിടുന്നത്.
ട്രാൻസ്പോർട്ട് ഭവൻ, ശ്രം ശക്തിഭവൻ എന്നിവയുടെ സ്ഥാനത്ത് വരുന്ന പാർലമെന്റിൽ അംഗങ്ങളുടെ ഓഫീസുകൾ നിർമിക്കുന്നതിനുള്ള ടെൻഡറും ഉടൻ പ്രഖ്യാപിക്കുമെന്ന് ഉദ്യോഗസ്ഥർ അറിയിച്ചു. ‘ഈ രണ്ട് കെട്ടിടങ്ങളിൽ നിന്നും പ്രവർത്തിക്കുന്ന ഓഫീസുകൾ വരും ദിവസങ്ങളിൽ മാറാൻ തുടങ്ങും. പാർലമെന്റ് അംഗങ്ങളുടെ ചേമ്പറുകൾ നിർമ്മിക്കുന്നതിന് ഉടൻ ടെൻഡർ വിളിക്കും,’ ഉദ്യോഗസ്ഥർ പറഞ്ഞു.
അടുത്ത 10-15 ദിവസത്തിനുള്ളിൽ സെൻട്രൽ അവന്യൂ വിസ്ത പദ്ധതിയുടെ പുനർവികസനത്തിനുള്ള പ്രവർത്തനങ്ങൾ പൂർത്തിയാകും. നവീകരിച്ച രാജ്പഥിൽ റിപ്പബ്ലിക് ദിന പരേഡ് നടത്തുകയെന്ന ലക്ഷ്യം കൈവരിച്ചതായി കേന്ദ്ര ഭവന, നഗരകാര്യ മന്ത്രി ഹർദീപ് സിംഗ് പുരി വ്യക്തമാക്കി. സെൻട്രൽ വിസ്ത പദ്ധതി പ്രദേശത്ത് പ്രധാനമന്ത്രി മോദിയുടെ അപ്രതീക്ഷിത സന്ദർശനം വലിയ വാർത്തയായിരുന്നു. 2021 സെപ്തംബർ 27ന് സെൻട്രൽ വിസ്ത പദ്ധതിയുടെ നിർമ്മാണ സ്ഥലത്ത് പ്രധാനമന്ത്രി നരേന്ദ്ര മോദി അപ്രതീക്ഷിതമായ ഒരു സന്ദർശനം നടത്തി നിർമ്മാണ പുരോഗതി വിലയിരുത്തിയിരുന്നു.
പണികൾ പരിശോധിക്കുകയും നിർമ്മാണത്തിന്റെ വിവിധ വശങ്ങളുടെ പുരോഗതിയെക്കുറിച്ച് ചർച്ച ചെയ്യാൻ എഞ്ചിനീയർമാരെയും തൊഴിലാളികളെയും കാണുകയും ചെയ്തു. പ്രധാനമന്ത്രി മോദി ഒരു മണിക്കൂറോളം സ്ഥലത്ത് ചെലവഴിച്ചു.
20,000 കോടി രൂപയുടെ സെൻട്രൽ വിസ്ത അവന്യൂ പദ്ധതി, രാജ്യത്തിന്റെ പവർ കോറിഡോർ, പുതിയ ത്രികോണ പാർലമെന്റ് കെട്ടിടം, ഒരു കോമൺ സെൻട്രൽ സെക്രട്ടേറിയറ്റ്, രാഷ്‌ട്രപതിഭവൻ മുതൽ ഇന്ത്യാ ഗേറ്റ് വരെയുള്ള 3 കിലോമീറ്റർ രാജ്പഥിന്റെ നവീകരണം, പ്രധാനമന്ത്രിയുടെ പുതിയ വസതിയും ഓഫീസും, വൈസ് പ്രസിഡന്റ് എൻക്ലേവ് എന്നിവയാണ് അടങ്ങിയിരിക്കുന്നത്.
കേന്ദ്രം 2019 സെപ്തംബർ 13ന് പ്രഖ്യാപിച്ച സെൻട്രൽ വിസ്ത പദ്ധതി ഡൽഹിയിലെ 86 ഏക്കർ ഭൂമി പുനർവികസനം ചെയ്യാൻ ലക്ഷ്യമിടുന്നു. 900-1200 എംപിമാരുടെ സിറ്റിങ് കപ്പാസിറ്റിയുള്ള ത്രികോണാകൃതിയിലാണ് പുതിയ പാർലമെന്റ് മന്ദിരം വിഭാവനം ചെയ്തിരിക്കുന്നത്.
