മഹാദേവനെ വിവാഹം ചെയ്യാൻ വേണ്ടി അതിർത്തിയിൽ താമസമാക്കി യുവതി. ഇന്ത്യ ചൈന അതിർത്തിയോട് ചേർന്നുള്ള നിരോധിത പ്രദേശമായ നാഭിദംഗിലാണ് യുവതി അനധികൃതമായി താമസിക്കുന്നത്. താൻ പാർവ്വതീ ദേവിയാണെന്നും തനിക്ക് മഹാദേവനെ വിവാഹം കഴിക്കണമെന്നും യുവതി പറയുന്നു. ഇവരെ തിരികെ കൊണ്ടുവരാനുള്ള ശ്രമങ്ങളും തുടരുന്നുണ്ട്.
ഹർമീന്ദർ കൗർ എന്ന യുവതിയാണ് ആരുടെയും വാക്ക് കേൾക്കാതെ മലമുകളിൽ പോയി താമസിക്കുന്നത്. ഇവരെ രക്ഷപ്പെടുത്തി തിരികെ എത്തിക്കാൻ പോലീസ് സംഘം പോയെങ്കിലും ഫലമുണ്ടായില്ല. തന്നെ ഇവിടെ നിന്നും കൊണ്ടുപോയാൽ താൻ ആത്മഹത്യ ചെയ്യുമെന്ന് പറഞ്ഞ് യുവതി ഭീഷണി മുഴക്കിയതായി പോലീസ് പറയുന്നു.
ഉത്തർപ്രദേശിലെ അലീഗഞ്ജ് സ്വദേശിയായ യുവതി അമ്മയോടൊപ്പം 15 ദിവസത്തെ അനുമതി നേടിയാണ് ഇവിടെ എത്തിയത്. എന്നാൽ 15 ദിവസം കഴിഞ്ഞിട്ടും അവിടെ നിന്നും മടങ്ങാൻ ഹർമീന്ദർ കൗർ തയ്യാറായില്ല. പോലീസും കുടുംബക്കാരും മാറി മാറി വിളിച്ചിട്ടും യുവതിയെ തിരികെ എത്തിക്കാൻ സാധിച്ചിട്ടില്ല.
ഈ സാഹചര്യത്തിൽ കൂടുതൽ പോലീസിനെ അയച്ച് യുവതിയെ കൂട്ടിക്കൊണ്ടുവരാനുള്ള പദ്ധതികളാണ് മെനയുന്നത്. യുവതിക്ക് മാനസികവിഭ്രാന്തി ഉള്ളതായും സംശയമുണ്ടെന്ന് പോലീസ് പറയുന്നു.
