ഡെറാഡൂണ്: ചാര്ധാം തീര്ത്ഥാടകരുടെ എണ്ണത്തില് വര്ധനവ്. മെയ് 3 ന് ആരംഭിച്ച ചാര്ധാം യാത്രയില് ഇതുവരെ 19,04,253 പേര് പങ്കെടുത്തു. ബദരീനാഥ്- കേദാര്നാഥ് ക്ഷേത്ര കമ്മിറ്റിയാണ് കണക്കുകള് പുറത്തുവിട്ടത്.
യമുനോത്രി, ഗംഗോത്രി, കേദാര്നാഥ്, ബദരീനാഥ് എന്നിവിടങ്ങളിലൂടെയാണ് ചാര്ധാം യാത്ര നടത്തുന്നത്.ഓരോ ഇടത്തും 1,000 വീതം തീര്ത്ഥാടകരുടെ എണ്ണം വര്ധിപ്പിക്കുമെന്ന് മുഖ്യമന്ത്രി പുഷ്കര് സിങ് ധാമി പറഞ്ഞു. ഒരേ ദിവസം തന്നെ 16,000 പേര്ക്ക് ബദരീനാഥും 13,000 പേര്ക്ക് കേദാര്നാഥും സന്ദര്ശിക്കാനാവും. ഇപ്പോള് 8,000 പേര്ക്ക് ഗംഗോത്രിയും 5,000 പേര്ക്ക് യമുനോത്രിയും സന്ദര്ശിക്കാനുള്ള അവസരമാണുള്ളത്.
മെയ് 8 നും ജൂണ് 11 ഇടയില് 6,57,547 പേര് ബദരീനാഥ് സന്ദര്ശിച്ചു. മെയ് 6നും ജൂണ് 11നും ഇടയില് 6,33,548 പേര് കേദാര്നാഥ് സന്ദര്ശിച്ചു. ഗംഗ-യമുനോത്രി യാത്ര മെയ് 3നും കേദാര്നാഥ് മെയ് 6 നും ബദരീനാഥ് മെയ് 8 നുമാണ് സന്ദര്ശകര്ക്കായി തുറന്നുകൊടുത്തത്.
മെയ് 27 വരെയുള്ള കണക്കുകള് പ്രകാരം 91 തീര്ത്ഥാടകര്ക്ക് അപകടങ്ങളിലും മറ്റുമായി ജീവഹാനി നേരിട്ടു. ജൂണ് അഞ്ചിനുണ്ടായ ബസ് അപകടത്തില് 26 പേര് മരിക്കുകയും 4 പേര്ക്ക് പരിക്കേല്ക്കുകയും ചെയ്തു.
