അഞ്ച് ദിവസം ഡോഗ് ഫുഡ് കഴിച്ചാൽ അഞ്ച് ലക്ഷം രൂപ സമ്മാനം. അവിശ്വസനീയമെന്ന് തോന്നുന്ന ഈ ജോലി നൽകുന്ന ഒരു കമ്പനിയുണ്ട്. യുകെ ആസ്ഥാനമായി പ്രവർത്തിക്കുന്ന പെറ്റ്-കമ്പനിയാണ് ഡോഗ് ഫുഡ് കഴിച്ചാൽ അഞ്ച് ലക്ഷം രൂപ വാഗ്ദാനം ചെയ്യുന്നത്.
കമ്പനി ഉൽപാദിപ്പിക്കുന്ന ഡോഗ് ഫുഡ് തുടർച്ചയായി അഞ്ച് ദിവസം കഴിച്ചു നോക്കുകയാണ് ജോലിക്കെടുക്കുന്നയാളുടെ ചുമതല. ഡോഗ് ഫുഡ് രുചിച്ചുനോക്കുന്ന ഉദ്യമത്തിൽ ഏർപ്പെട്ടാൽ അദ്ദേഹത്തിന് അനുഭവപ്പെടുന്ന കാര്യങ്ങൾ പങ്കുവെക്കണം. ആഹാരത്തിന്റെ രുചി, കഴിക്കുമ്പോൾ എന്ത് തോന്നുന്നു, എനർജി ലെവൽ എത്രമാത്രമുണ്ട്, മാനസിക നില എപ്രകാരമാണ്.. തുടങ്ങിയ കാര്യങ്ങൾ രേഖപ്പെടുത്തണം. ഏറ്റവും പ്രധാനമായി ഡോഗ് ഫുഡ് കഴിക്കുന്ന അഞ്ച് ദിവസം മറ്റ് ആഹാരങ്ങളൊന്നും തന്നെ കഴിക്കാൻ പാടുള്ളതല്ല..
യുകെയിലെ ഒ.എം.എൻ.ഐ അഥവാ ഒമ്നി എന്ന കമ്പനിയാണ് ഡോഗ് ഫുഡ് രുചിച്ച് അഭിപ്രായം പറയാൻ മനുഷ്യനെ തിരഞ്ഞെടുക്കുന്നത്. ഈ ജോലി ആഗ്രഹിക്കുന്നവർക്ക് പ്രത്യേക യോഗ്യതകൾ ഒന്നും ആവശ്യമില്ലെന്ന് കമ്പനി വ്യക്തമാക്കിയിട്ടുണ്ട്. അതേസമയം അലർജിയുള്ളവർ ഈ തൊഴിലിനായി അപേക്ഷിക്കരുതെന്നാണ് കർശന നിർദേശം. യുകെയിൽ താമസിക്കുന്ന 18 വയസിന് മുകളിലുള്ളവർക്ക് ഡോഗ് ഫുഡ് രുചിച്ച് അഞ്ച് ലക്ഷം രൂപ നേടാമെന്നും കമ്പനി വ്യക്തമാക്കുന്നു.
ഇനി ഡോഗ് ഫുഡ് രുചിക്കാൻ മനുഷ്യൻ തന്നെ വേണമെന്ന കമ്പനിയുടെ നിർബന്ധത്തിന് പിന്നിലുള്ള കാരണമെന്തെന്ന് നോക്കാം..
ഒമ്നി എന്ന കമ്പനി പ്രധാനമായും സസ്യാഹാരങ്ങൾ ഉപയോഗിച്ച് ഡോഗ് ഫുഡ് ഉൽപാദിപ്പിക്കുന്നവരാണ്. അതിനാൽ വീഗൻ പെറ്റ് കമ്പനി എന്നാണ് ഒമ്നി അറിയപ്പെടുന്നത്. മധുരക്കിഴങ്ങ്, പയർ, അരി, മത്തങ്ങ, ബ്ലൂബെറി, കടല, ക്രാൻബെറി എന്നിവയാണ് ഡോഗ് ഫുഡിലെ പ്രധാന ഘടകങ്ങൾ. അതുകൊണ്ട് തന്നെ മനുഷ്യർക്ക് ഭക്ഷിക്കാൻ സാധിക്കുന്ന വിധത്തിലാണ് ഒമ്നി കമ്പനി ഡോഗ് ഫുഡ് ഉണ്ടാക്കുന്നതെന്ന് സഹസ്ഥാപകൻ ശിവ് ശിവകുമാർ പറയുന്നു. മനുഷ്യന് വേണ്ടാത്ത ആഹാര പദാർത്ഥങ്ങളോ ബാക്കിവന്ന ഭക്ഷണമോ ചേർത്തിട്ടല്ല തങ്ങൾ ഡോഗ് ഫുഡ് ഉൽപാദിപ്പിക്കുന്നതെന്നും അതുകൊണ്ട് തന്നെയാണ് ഇത് രുചിച്ച് നോക്കാൻ മനുഷ്യരെ തന്നെ നിയോഗിക്കുന്നതെന്നും അദ്ദേഹം പറഞ്ഞു.
