ന്യൂഡൽഹി : രാജ്യത്ത് തദ്ദേശീയമായി നിർമ്മിച്ച കൊറോണ പ്രതിരോധ വാക്സിനായ കൊവാക്സിൻ കൂടുതൽ ഫലപ്രദമെന്ന് റിപ്പോർട്ട്. ഡെൽറ്റ, ഒമിക്രോൺ എന്നീ വേരിയന്റുകൾക്കെതിരെ കൊവാക്സിന്റെ ബൂസ്റ്റർ ഡോസ് കൂടുതൽ ഫലപ്രദമെന്ന് കണ്ടെത്തി. ഇന്ത്യൻ കൗൺസിൽ ഓഫ് മെഡിക്കൽ റിസേർച്ചിന്റെ കീഴിൽ നാഷണൽ ഇൻസ്റ്റിറ്റ്യൂട്ട് ഓഫ് വൈറോളജിയാണ് ഇത് സംബന്ധിച്ച് പഠനം നടത്തിയത്.
സിറിയൻ ഹാംസ്റ്റർ മാതൃകയിലാണ് ഡെൽറ്റ വേരിയന്റിനും ഒമിക്രോൺ വേരിയന്റിനുമെതിരായ കൊവാക്സിന്റെ ഫലപ്രാപ്തി പരിശോധിച്ചത്. ആന്റിബോഡി റിയാക്ഷൻ, ക്ലിനിക്കൽ നിരീക്ഷണങ്ങൾ, വൈറൽ ലോഡ് റിഡക്ഷൻ, ശ്വാസകോശ സംബന്ധമായ രോഗത്തിന്റെ തീവ്രത എന്നിവയാണ് ഗവേഷകർ പരിശോധിച്ചത്. കൊവാക്സിന്റെ രണ്ടും മൂന്നും ഡോസ് വാക്സിൻ കുത്തിവെപ്പിന് ശേഷം ശ്വാസകോശ രോഗത്തിന്റെ തീവ്രതയിൽ ഗണ്യമായ കുറവ് കാണാൻ സാധിക്കുന്നുണ്ടെന്നാണ് പഠന റിപ്പോർട്ടുകൾ തെളിയിക്കുന്നത്.
ഹൈദരാബാദ് ആസ്ഥാനമായി പ്രവർത്തിക്കുന്ന ഭാരത് ബയോടെക്കും ഐസിഎംആറും സംയുക്തമായാണ് കൊവാക്സിൻ നിർമ്മിച്ചത്. തുടർന്ന് 2021 ജനുവരിയിൽ ഇതിന്റെ കുത്തിവെയ്പ് ആരംഭിച്ചു.
ഫേസ് 2 ഡബിൾ ബ്ലൈൻഡ്, റാൻഡമൈസ്ഡ് കൺട്രോൾഡ് കൊവാക്സിൻ പഠനങ്ങളുടെ ഫലങ്ങൾ ഭാരത് ബയോടെക് നേരത്തെ പുറത്തുവിട്ടിട്ടുണ്ട്. ഇതിൽ ദീർഘകാല സുരക്ഷയ്ക്കൊപ്പം പ്രത്യാഘാതങ്ങൾ ഉണ്ടാകില്ലെന്നും വ്യക്തമാക്കുന്നുണ്ട്.
Comments