നായയ്‌ക്കാണോ കടുവയ്‌ക്കാണോ കൂടുതൽ ധൈര്യവും ശൗര്യവുമുണ്ടാകുക. ഈ ചോദ്യത്തിന് ഉത്തരം നൽകുന്ന വീഡിയോയാണ് ഇപ്പോൾ സമൂഹമാദ്ധ്യമങ്ങളിൽ തരംഗമാകുന്നത്. ഏഴ് കടുവകളുടെ മധ്യത്തിൽ നിന്നുകൊണ്ട് നിർത്താതെ കുരയ്‌ക്കുന്ന ഒരു ഗോൾഡൻ റിട്രീവറാണ് ദൃശ്യങ്ങളിലെ താരം.
‘ടൈഗർ ബിഗ്ഫാൻ’ എന്ന ഇൻസ്റ്റഗ്രാം പേജ് പങ്കുവെച്ച വീഡിയോയാണിത്. ഭീമന്മാരായ 6-7 കടുവകൾക്കിടയിൽ കൂസലില്ലാതെ നിന്ന് ധൈര്യസമേതം കുരയ്‌ക്കുന്ന നായയെ കണ്ട് കാഴ്ചക്കാർ അമ്പരന്നു. അതിശയകരമായ മറ്റൊരു വസ്തുതയെന്തെന്നാൽ ഈ കടുവകളൊന്നും തന്നെ കുരച്ച് ബഹളമുണ്ടാക്കുന്ന നായയെ ആക്രമിക്കാൻ മുതിരുന്നില്ല. നായയുടെ കുരയോ സാന്നിധ്യമോ ഒന്നും തന്നെ കടുവകളെ പ്രകോപിപ്പിക്കുന്നുമില്ല.
”കടുവകളായ മക്കളെ വളർത്തുക എന്നത് ഒരു അമ്മ-നായയ്‌ക്ക് അത്ര എളുപ്പമല്ല ” എന്ന തലക്കെട്ടോടെയാണ് ‘ടൈഗർ ബിഗ്ഫാൻ’ ഈ രസകരമായ വീഡിയോ പോസ്റ്റ് ചെയ്തത്. കൗതുകം നിറഞ്ഞ ദൃശ്യങ്ങൾ വൈറലായതോടെ നിരവധിയാളുകൾ പ്രതികരണവുമായെത്തി. ഇതിൽ ശരിക്കുമുള്ള കടുവ ഒന്നേയുള്ളൂവെന്നും അത് നായയാണെന്നും ചിലർ അഭിപ്രായപ്പെട്ടു. ദൃശ്യങ്ങളിലെ നായ കടുവയെ പോലെയും കടുവകൾ നായയെ പോലെയുമാണെന്നും ചിലർ കമന്റെഴുതി. ഏറെ വൈറലായ ഈ വീഡിയോ 1.2 ദശലക്ഷമാളുകളാണ് ഇതിനോടകം കണ്ടത്.
Comments