ശ്രീനഗർ: 2020ലെ ഗാൽവൻ സംഘർഷത്തിൽ വീരമൃത്യു വരിച്ച ഇന്ത്യൻ യോദ്ധാക്കൾക്ക് ആദരമർപ്പിച്ച് രാജ്യരക്ഷാ മന്ത്രി രാജ്നാഥ് സിംഗ്.
രാജ്യത്തിന്റെ അഭിമാനം സംരക്ഷിക്കുന്നതിനായി 2020 ജൂൺ 15-16 തീയതികളിൽ ഗാൽവനിൽ ധീരമായി പൊരുതി വീരമൃത്യു വരിച്ച യോദ്ധാക്കളെ ആദരപൂർവ്വം സ്മരിക്കുന്നു. അവരുടെ ധീരതയും ശൗര്യവും പരമമായ ത്യാഗവും ഒരിക്കലും വിസ്മരിക്കപ്പെടില്ല. ആ ധീരയോദ്ധക്കൾക്ക് എന്റെ പ്രണാമം. രാജ്നാഥ് സിംഗ് ട്വീറ്റ് ചെയ്തു.
2020 ജൂൺ 15ന് അതിർത്തി ലംഘിച്ചു കടന്നുകയറാൻ ശ്രമിച്ച ചൈനീസ് പട്ടാളക്കാരെ ഇന്ത്യൻ സൈന്യം ധീരമായി ചെറുത്തു. ഗാൽവൻ താഴ്വരയിലും പാംഗോംഗ് തടാകത്തിലുമായിരുന്നു പ്രധാനമായും സംഘർഷങ്ങൾ അരങ്ങേറിയത്.
ഗാൽവൻ വാർഷികത്തിൽ ജമ്മു കശ്മീരിൽ ദ്വിദിന സന്ദർശനത്തിലാണ് രാജ്യരക്ഷാ മന്ത്രി രാജ്നാഥ് സിംഗ്. അതിർത്തി മേഖലകളിൽ സന്ദർശനം നടത്തുന്ന അദ്ദേഹം സൈനികരുമായി നേരിട്ട് സംവദിക്കും. അതിർത്തിയിലെ നിലവിലെ സ്ഥിതിഗതികൾ അദ്ദേഹം വിലയിരുത്തും.
Comments