കശ്മീരി പണ്ഡിറ്റുകളുടെ വംശഹത്യയെ സംബന്ധിച്ച് വിവാദ പരാമർശം; നടി സായ് പല്ലവിക്കെതിരെ കേസെടുത്തു

ഹൈദരാബാദ്: കശ്മീരി പണ്ഡിറ്റുകളുടെ പലായനവുമായി ബന്ധപ്പെട്ട് നടി സായ് പല്ലവി നടത്തിയ പരാമർശത്തിൽ പോലീസ് കേസെടുത്തു. ബജ്‌രംഗ്ദൾ നേതാക്കൾ നൽകിയ പരാതിയുടെ അടിസ്ഥാനത്തിലാണ് സായ് പല്ലവിക്കെതിരെ സുൽത്താൻ ബസാർ പോലീസ് കേസെടുത്തത്.

കശ്മീരി പണ്ഡിറ്റുകളുടെ പലായനവും വംശഹത്യയും ചിത്രീകരിച്ച ദി കശ്മീർ ഫയൽസ് എന്ന ചിത്രത്തെയും ഗോരക്ഷ പ്രവർത്തകരെയും അപമാനിക്കുന്ന തരത്തിലാണ് സായ് പല്ലവി പരാമർശം നടത്തിയതെന്നാണ് പരാതി. ഒരു മാദ്ധ്യമത്തിന് നൽകിയ അഭിമുഖത്തിലായിരുന്നു പരാതിക്കാസ്പദമായ പരാമർശം സായ് പല്ലവി നടത്തിയത്.

വിരാട പർവ്വം എന്ന ചിത്രത്തിന്റെ പ്രമോഷന് വേണ്ടി എത്തിയപ്പോഴായിരുന്നു സംഭവം. കശ്മീരി പണ്ഡിറ്റുകൾ നേരിട്ട കലാപത്തെ പശുക്കടത്തുമായി ബന്ധപ്പെട്ട് നടക്കുന്ന ആക്രമണങ്ങളോട് ഉപമിച്ചതാണ് പരാമർശം വിവാദമാകാൻ ഇടയാക്കിയത്. നടിയുടെ അഭിമുഖം പരിശോധിച്ച് തുടർനടപടികൾ സ്വീകരിക്കുമെന്ന് സുൽത്താൻ ബസാർ പോലീസ് അറിയിച്ചു.

“For me violence is wrong form of communication. Mine is a neutral family where they only taught to be a good human being. The oppress, however, should be protected. I don’t know who’s right & who’s wrong. If you are a good human being, you don’t feel one is right.”
– #SaiPallavi pic.twitter.com/o6eOuKvd2G

— Hate Detector 🔍 (@HateDetectors) June 14, 2022

നടിയുടെ രാഷ്‌ട്രീയ കാഴ്ചപ്പാടുകളെക്കുറിച്ച് ചോദ്യകർത്താവ് ആരാഞ്ഞപ്പോഴാണ് സായ് പല്ലവി വിവാദ പരാമർശം നടത്തിയത്. താൻ നിഷ്പക്ഷമായി ചിന്തിക്കുന്നയാളാണെന്നും വളർന്നുവന്നത് അത്തരമൊരു സാഹചര്യത്തിലാണെന്നും സായ് പല്ലവി പറഞ്ഞു. ഇടതുപക്ഷമാണോ വലതുപക്ഷമാണോ ശരിയെന്ന് ചോദിച്ചാൽ അതിനുത്തരം തനിക്ക് പറയാൻ കഴിയില്ലെന്നും അവർ ചൂണ്ടിക്കാട്ടി. ഇതിന് പിന്നാലെയാണ് കശ്മീരി പണ്ഡിറ്റുകൾ നേരിട്ട വംശഹത്യയും പശുക്കടത്തിനെ തുടർന്നുണ്ടാകുന്ന ആക്രമണങ്ങളും ഒരേതട്ടിലാണെന്ന് സായ് പല്ലവി അഭിപ്രായപ്പെട്ടത്. ഇതോടെ നടിയുടെ അഭിമുഖം വൈറലാകുകയും വിവാദ പരാമർശം വലിയ തോതിൽ ചർച്ചയാകുകയുമായിരുന്നു.