ഏറ്റവും ആരോഗ്യകരമായ പച്ചക്കറികളിൽ ഒന്നാണ് ബീറ്റ്റൂട്ട്. പോഷകങ്ങളാൽ സമ്പുഷ്ടമാണെന്നത് കൂടാതെ ആരോഗ്യപരമായ നിരവധി ഗുണങ്ങളാൽ സമൃദ്ധവുമാണ് ഈ പച്ചക്കറി. ഹൃദ്രോഗമുള്ളവർക്ക് (കൊറോണറി ഹാർട്ട് ഡിസീസ്) ദിവസവും ഒരു ഗ്ലാസ് ബീറ്റ്റൂട്ട് ജ്യൂസ് കുടിക്കുന്നത് വളരെ നല്ലതാണെന്നും ആരോഗ്യം വീണ്ടെടുക്കാൻ സഹായിക്കുമെന്നും അടുത്തിടെ നടത്തിയ പഠനങ്ങൾ തെളിയിക്കുന്നു.
മാഞ്ചസ്റ്ററിലെ ബ്രിട്ടീഷ് കാർഡിയോവാസ്‌കുലർ സൊസൈറ്റി കോൺഫറൻസിൽ അവതരിപ്പിച്ച ഗവേഷണത്തിലാണ് ബീറ്റ്റൂട്ട് ജ്യൂസിന്റെ ഗുണങ്ങൾ പ്രതിപാദിക്കുന്നത്. രക്തക്കുഴലുകൾക്ക് സംഭവിക്കുന്ന വീക്കം കുറയ്‌ക്കാൻ ഒരു സാധാരണ ഗ്ലാസ് ബീറ്റ്റൂട്ട് ജ്യൂസിന് സഹായിക്കുന്നുവെന്നാണ് കണ്ടെത്തൽ. ഹൃദ്രോഗമുള്ളവരിൽ പൊതുവെ കൂടുതലായി കണ്ടുവരുന്ന അവസ്ഥയാണിത്. 14 സന്നദ്ധപ്രവർത്തകരിൽ നടത്തിയ പഠനത്തിനൊടുവിലാണ് ഇത് ഗവേഷകർ കണ്ടെത്തിയത്.
നമ്മുടെ ശരീരത്തിൽ ഉത്പാദിപ്പിക്കപ്പെടുന്ന, നല്ല ആരോഗ്യത്തിന് അത്യന്താപേക്ഷിതമായ ഒന്നാണ് നൈട്രിക് ഓക്‌സൈഡ്. ഇത് രക്തസമ്മർദ്ദം നിയന്ത്രിക്കാൻ സഹായിക്കുന്നു. എന്നാൽ ഹൃദ്രോഗമുള്ളവരിൽ നൈട്രിക് ഓക്‌സൈഡിന്റെ അളവ് കുറവാണ്. അതിനാൽ നൈട്രേറ്റുകളാൽ സമ്പുഷ്ടമാണ് ബീറ്റ്റൂട്ട് പതിവാക്കുന്നത് നൈട്രിക് ഓക്‌സൈഡിന്റെ അളവ് കൂട്ടാൻ സഹായിക്കുന്നു. ബീറ്റ്‌റൂട്ട്ജ്യൂസ് കുടിക്കുന്നതിലൂടെ ശരീരത്തിന് അകത്തേക്കുന്ന നൈട്രേറ്റുകളെ നൈട്രിക് ഓക്‌സൈഡാക്കി മാറ്റാൻ നമ്മുടെ ശരീരത്തിന് കഴിയും. ഇതോടെ ഹൃദ്രോഗമുള്ളവർക്ക് ഹൃദയാഘാത സാധ്യത കുറയ്‌ക്കാനാകുമെന്നാണ് കണ്ടെത്തൽ.
ബീറ്റ്റൂട്ട് ജ്യൂസിൽ വിറ്റാമിൻ സി പോലുള്ള ആന്റിഓക്സിഡന്റുകൾ ധാരാളം അടങ്ങിയിട്ടുണ്ട്. കൂടാതെ നമ്മുക്ക് സമ്മർദ്ദം കുറയ്‌ക്കാൻ സഹായിക്കുന്ന ഘടകമായ ബീറ്റൈൻസ് എന്ന സംയുക്തങ്ങളാലും സമ്പന്നമാണ് ബീറ്റ്റൂട്ട്. അതിനാൽ ദിവസേന ബീറ്റ്റൂട്ട് ജ്യൂസ് കുടിക്കുന്നത് ആരോഗ്യത്തെ പരിപോഷിപ്പിക്കാൻ സഹായിക്കുമെന്നാണ് വിലയിരുത്തൽ.
