പുരി: അന്താരാഷ്ട്ര യോഗദിനത്തോട് അനുബന്ധിച്ച് ഒഡീഷയിലെ പുരി തീരത്ത് പ്രധാനമന്ത്രി നരേന്ദ്രമോദിയുടെ കൂറ്റന് മണല് ശില്പ്പം നിര്മ്മിച്ചു. പത്മശ്രീ അവാര്ഡ് ജേതാവും സാന്റ് ആര്ട്ടിസ്റ്റുമായ സുദര്ശന് പട്നായികാണ് ഇതിനു പിന്നില്.
ആറ് ടണ് മണല് ഉപയോഗിച്ചാണ് ശില്പ്പത്തിന്റെ പണി പൂര്ത്തികരിച്ചത്. 3500 ചതുരശ്ര അടി വ്യാപ്തി ശില്പ്പത്തിനുണ്ട്. ഏഴ് അടി ഉയരമുള്ള ശില്പത്തില് സൂര്യനമസ്കാരം അഭ്യസിക്കുന്ന പ്രധാനമന്ത്രിയെ കാണാന് കഴിയും. ആസാം പരമ്പരാഗത വസ്ത്രമായ ആസാമീസ് ഗമൂസയും കുര്ത്തയുമാണ് ശില്പ്പത്തിന്റെ വേഷം.
ജനപ്രീതി കൂടുതലുള്ള നേതാവും യോഗയെ അന്താരാഷ്ട്ര തലത്തില് എത്തിക്കുന്നതില് മുഖ്യപങ്ക് വഹിച്ചയാള് എന്ന നിലയിലുമാണ് അദ്ദേഹത്തിന്റെ ശില്പം നിര്മിക്കാന് തീരുമാനിച്ചതെന്ന് വ്യക്തമാക്കി. കഴിഞ്ഞ പത്തുവര്ഷകാലമായി മോദി യോഗ അഭ്യസിക്കുന്നുണ്ട്. ഉറപ്പുള്ള ശരീരവും മനസും യോഗ അഭ്യസിക്കുന്നതിലൂടെ കൈവരിച്ചെന്നും പട്നായിക് പറഞ്ഞു.
മനുഷ്യത്വത്തിനായി യോഗ എന്നതാണ് ഇത്തവണത്തെ യോഗദിന സന്ദേശം. പ്രധാനമന്ത്രിയുടെ നേതൃത്വത്തില് ആയിരക്കണക്കിന് പേരാണ് പരിപാടിയില് പങ്കെടുത്തത്. ആസാദി കാ അമൃത് മഹോത്സവത്തെ യോഗ ദിനാഘോഷങ്ങളുമായി സംയോജിപ്പിച്ച് മൈസൂരുവില് നടക്കുന്ന പരിപാടിയോടൊപ്പം 75 കേന്ദ്രമന്ത്രിമാരുടെ നേതൃത്വത്തില് രാജ്യത്തെ 75 കേന്ദ്രങ്ങളില് യോഗ പ്രകടനങ്ങള് നടക്കും. രാജ്യത്തുടനീളം വിവിധ വിദ്യാഭ്യാസ, സാമൂഹിക, രാഷ്ട്രീയ, സാംസ്കാരിക, മത, കോര്പ്പറേറ്റ് സ്ഥാപനങ്ങളും കോടിക്കണക്കിന് വരുന്ന ജനങ്ങളും യോഗാ പ്രദര്ശനം നടത്തും.
