കൊച്ചി: നടൻ വിജയ് ബാബുവിന് മുൻകൂർ ജാമ്യം ലഭിച്ചതിനെതിരെ അപ്പീൽ പോകുമെന്ന് അറിയിച്ച് പോലീസ്. പീഡനക്കേസ് രജിസ്റ്റർ ചെയ്തതിന് പിന്നാലെ വിദേശത്ത് ഒളിവിൽ പോകുകയും ജാമ്യം നേടാൻ വിദേശത്ത് നിന്നുകൊണ്ട് പരിശ്രമിക്കുകയും ചെയ്യുന്നത് പ്രോത്സാഹിപ്പിക്കാൻ കഴിയില്ലെന്ന് കൊച്ചി സിറ്റി പോലീസ് കമ്മീഷണർ സി.എച്ച് നാഗരാജു വ്യക്തമാക്കി.
കേസിൽ അപ്പീൽ പോകുന്നത് സംബന്ധിച്ച് പരിശോധിച്ച് വരികയാണ്. ഇരയ്‌ക്കൊപ്പമാണ് പോലീസ് നിന്നത്. വിജയ് ബാബു പോലീസിനെ കബളിപ്പിക്കുകയാണ് ചെയ്തതെന്നും കമ്മീഷണർ പറഞ്ഞു. പ്രതി ഇരയെ സ്വാധീനിക്കാൻ ശ്രമിച്ചുവെന്ന കണ്ടെത്തലിൽ ഉറച്ച് നിൽക്കുകയാണ്. അന്വേഷണം ശക്തമായി പുരോഗമിക്കുമെന്നും പോലീസ് അറിയിച്ചു.
ഇന്ന് രാവിലെയായിരുന്നു യുവനടിയെ പീഡിപ്പിച്ച കേസിൽ നടൻ വിജയ് ബാബുവിന് കോടതി ഉപാധികളോടെ മുൻകൂർ ജാമ്യം നൽകിയത്. നടനെതിരായ ആരോപണം ഗുരുതരമാണെങ്കിലും ജാമ്യം നൽകുകയാണെന്നും കേസിൽ വിജയ് ബാബുവിനെ അറസ്റ്റ് ചെയ്യുകയാണെങ്കിൽ ജാമ്യത്തിൽ വിട്ടയക്കണമെന്നും കോടതി വ്യക്തമാക്കി. ജൂൺ 27 മുതൽ ഏഴ് ദിവസം ചോദ്യം ചെയ്യലിനായി അന്വേഷണ ഉദ്യോഗസ്ഥന് മുന്നിൽ ഹാജരാകണമെന്നും ഹൈക്കോടതി നിർദേശിച്ചു.
