ബോളിവുഡിൽ ഉൾപ്പെടെ ശ്രദ്ധ നേടിയ ബാർബി ശർമ്മ പ്രധാന കഥാപാത്രമായെത്തുന്ന ”പ്യാലി” എന്ന ചിത്രത്തിന്റെ ക്യാരക്ടർ പോസ്റ്റർ പുറത്ത്. ശ്രീനിവാസന്റെ ക്യാരക്ടർ പോസ്റ്ററാണ് അണിയറപ്രവർത്തകർ പുറത്തിട്ടത്.
ദുൽഖറിന്റെ വേഫെറെർ ഫിലിംസ് അവതരിപ്പിക്കുന്ന ചിത്രം നവാഗതരായ ബിബിത- റിൻ ദമ്പതികളാണ് സംവിധാനം ചെയ്യുന്നത്. ദുൽഖർ തന്നെയാണ് തന്റെ സമൂഹമാദ്ധ്യമ പേജുകളിലൂടെ ചിത്രത്തിന്റെ റിലീസ് പ്രഖ്യാപിച്ചത്. ചിത്രത്തിൽ സായിദ് എന്ന കഥാപാത്രത്തെയാണ് ശ്രീനിവാസൻ അവതരിപ്പിക്കുന്നത്.
ജൂലൈ എട്ടിനാണ് ചിത്രം തിയേറ്ററുകളിൽ പ്രദർശനത്തിന് എത്തുന്നത്. എൻ എഫ് വർഗീസ് പിക്ചേഴ്സിന്റെ ബാനറിൽ ഒരുങ്ങുന്ന ചിത്രത്തിന്റെ നിർമാണം നടൻ എൻ എഫ് വർഗീസിന്റെ മകൾ സോഫിയ വർഗീസാണ് നിർവ്വഹിക്കുന്നത്. സാഹോദര്യ സ്നേഹമാണ് പ്യാലി എന്ന ചിത്രത്തിന്റെ പ്രമേയം.
ജോർജ് ജേക്കബ്, മാമുക്കോയ, അപ്പാനി ശരത്, റാഫി, അൽത്താഫ് സലിം, സുജിത് ശങ്കർ തുടങ്ങിയവരും ചിത്രത്തിലുണ്ട്. ജിജു സണ്ണിയാണ് ചിത്രത്തിന്റെ ഛായാഗ്രാഹണം നിർവഹിക്കുന്നത്. പ്രശാന്ത് പിള്ളയാണ് സംഗീത സംവിധാനം ചെയ്യുന്നത്.
