കോട്ടയം: പശു പാൽ തരും, കോഴി നമുക്ക് മുട്ട തരും എന്നൊക്കയാണ് നമ്മൾ ചെറിയ ക്ലാസുകളിൽ പഠിച്ചിരുന്നത്. എന്നാൽ കോഴി നമ്മുടെ കൂടെ ഫുട്ബോൾ കളിക്കുമെന്നാണ് ചേർത്തലയിലെ കുട്ടികൾ പറയുന്നത്. കാരണമെന്തന്നല്ലേ യുവ സംവിധായകനായ അഭിലാഷ് കോടവേലിയുടെ വീട്ടിലെ പൂവൻ കോഴിയാണ് ഇതിന് കാരണം. സാധാരണ കോഴികളെ പോലെയല്ല. ഗോൾ വല കാക്കുന്ന താരമാണ് ഇവിടുത്തെ വളർത്ത് കോഴി.
അഭിലാഷിന്റെ കുട്ടികളുടെ കൂടെയാണ് പൂവൻകോഴിയുടെ ഫുട്ബോൾ കളി. കുട്ടികൾ കളിക്കുമ്പോൾ ആദ്യമൊക്കെ അടുത്ത് വന്ന് നിൽക്കുമായിരുന്ന കോഴി പിന്നെ പന്തിന് പിന്നാലെ ഓടി തുടങ്ങുകയായിരുന്നു. പിന്നെ കുട്ടികൾ മുറ്റത്ത് പന്തുമായി എത്തിയാൽ കോഴി എവിടെയാണെങ്കിലും ഓടിയെത്തും. പിന്നെ ഗോൾ വല കാക്കുന്ന മിന്നും താരമായി മാറുകയായിരുന്നു.
കോഴിയുടെ ഈ ഫുട്ബോൾ കളി ഒരു കൗതുകത്തിന്റെ പുറത്ത് വീഡിയോ എടുക്കുകയായിരുന്നു. പിന്നീട് സുഹൃത്തുക്കൾക്കും ബന്ധുക്കൾക്കും അയച്ചതോടെയാണ് വീട്ടിലെ കോഴി അത്ര നിസാരക്കാരനല്ല എന്ന് ബോധ്യം വന്നത്. ഫുട്ബോൾ കളിക്കുന്ന കോഴി വൈറലായതോടെ എട്ടാം ക്ലാസ് വിദ്യാർത്ഥിയായ ആന്റോ ജേക്കബിനും അനിയൻ മൂന്നാ ക്ലാസുകാരനായ ആൽബിൻ ജേക്കബിനും ഒപ്പം കോഴി ഫുട്ബോൾ കളിക്കുന്നത് കാണാൻ നിരവധി പേരാണ് എത്തുന്നത്.
