ദിസ്പൂര്‍: വെള്ളപ്പൊക്ക ദുരിതത്തില്‍ നിന്നും അസമിനെ കരകയറ്റാന്‍ സഹായവുമായി ഇന്ത്യന്‍ വ്യോമസേന. ജൂണ്‍ 21 മുതല്‍ അസം, മേഘാലയ സംസ്ഥാനങ്ങളിലെ വിവിധ സ്ഥലങ്ങളില്‍ വ്യോമസേന രക്ഷപ്രവര്‍ത്തനം നടത്തുന്നു. 74 രക്ഷാപ്രവര്‍ത്തനങ്ങള്‍ പൂര്‍ത്തീകരിച്ചു. ഒറ്റപ്പെട്ട് കിടന്ന 253ല്‍ പരം ആളുകളെ രക്ഷിച്ചു. പ്രളയബാധിത പ്രദേശത്ത് 200 ടണ്ണിലധികം ഭക്ഷണസാധനങ്ങളും സഹായവുമെത്തിച്ചു.
വെള്ളപ്പൊക്കം നിരീക്ഷിക്കാനും ദുരിതബാധിതര്‍ക്ക് ആവശ്യമായവ എത്തിക്കുന്നതിനും രണ്ട് ഡ്രോണ്‍ സംവിധാനങ്ങളും ഒരുക്കിയിട്ടുണ്ട്. 207 പേര്‍ അടങ്ങുന്ന എട്ട് എന്‍ഡിആര്‍എഫ് ടീമുകളും 120 ഉദ്യോഗസ്ഥരുള്ള ആര്‍മി യൂണിറ്റും ഒമ്പത് ബോട്ടുകളും സില്‍ച്ചാറില്‍ രക്ഷാപ്രവര്‍ത്തനത്തില്‍ ഏര്‍പ്പെട്ടിട്ടുണ്ടെന്നും സര്‍ക്കാര്‍ വ്യക്തമാക്കി. സി-130 സൂപ്പര്‍ ഹെര്‍കുലീസ്, 32- എയര്‍ക്രാഫ്റ്റ് വിമാനങ്ങള്‍, ലൈറ്റ് ഹെലികോപ്റ്ററുകള്‍ തുടങ്ങിയവ രംഗത്തിറക്കിയിട്ടുണ്ട്. സിവില്‍ അഡ്മിനിസ്‌ട്രേഷന്‍ വകുപ്പിന്റെ സഹായത്തോടെയാണ് പ്രവര്‍ത്തനങ്ങള്‍.
വെള്ളപ്പൊക്ക സാഹചര്യം രൂക്ഷമായി തന്നെ തുടരുകയാണ്.തുടര്‍ച്ചയായ ആറാം ദിവസവും കച്ചാര്‍ ജില്ലയിലെ സില്‍ച്ചാര്‍ പട്ടണം വെള്ളത്തില്‍ മുങ്ങി.
ഇന്നത്തെ കണക്കുകള്‍ പ്രകാരം മരണസംഖ്യ 118 ആയി ഉയര്‍ന്നു. 28 ജില്ലകളിലായി 33.03 ലക്ഷം പേരെയാണ് പ്രളയം ബാധിച്ചത്.
