ദാംബുള്ള: ശ്രീലങ്കയ്‌ക്കെതിരായ രണ്ടാം ട്വന്റി 20 മത്സരത്തിലും തകർപ്പൻ ജയം നേടി പരമ്പര സ്വന്തമാക്കി ഇന്ത്യൻ വനിതകൾ. ഇന്ന് നടന്ന മത്സരത്തിൽ 5 വിക്കറ്റിനാണ് ഇന്ത്യയുടെ വിജയം. ടോസ് നേടി ബാറ്റിംഗ് തിരഞ്ഞെടുത്ത ശ്രീലങ്ക 20 ഓവറിൽ 7 വിക്കറ്റ് നഷ്ടത്തിൽ 125 റൺസ് നേടി. മറുപടി ബാറ്റിംഗിൽ, 19.1 ഓവറിൽ 5 വിക്കറ്റ് നഷ്ടത്തിൽ ഇന്ത്യ വിജയലക്ഷ്യം മറികടന്നു.
ശ്രീലങ്കയ്‌ക്ക് വേണ്ടി ഓപ്പണർമാരായ വിഷ്മി ഗുണരത്നെയും ക്യാപ്ടൻ അത്തപത്തുവും ചേർന്ന് ഒന്നാം വിക്കറ്റിൽ 87 റൺസിന്റെ കൂട്ടുകെട്ട് പടുത്തുയർത്തി. 43 റൺസെടുത്ത അത്തപത്തുവിനെ പൂജ വസ്ത്രകാർ മടക്കിയതോടെ ശ്രീലങ്കയുടെ ബാറ്റിംഗ് തകർന്നു. തൊട്ടു പിന്നാലെ 45 റൺസെടുത്ത വിഷ്മിയും മടങ്ങി. പിന്നീട് വന്ന ആർക്കും രണ്ടക്കം കടക്കാൻ ആയില്ല. ഇന്ത്യക്ക് വേണ്ടി ദീപ്തി ശർമ്മ 2 വിക്കറ്റ് വീഴ്‌ത്തി.
39 റൺസെടുത്ത ഓപ്പണർ സ്മൃതി മന്ഥാനയാണ് ഇന്ത്യൻ ഇന്നിംഗ്സിലെ ടോപ്പ് സ്കോറർ. ക്യാപ്ടൻ ഹർമൻപ്രീത് കൗർ 31 റൺസുമായി ഇന്ത്യയെ വിജയത്തിലേക്ക് നയിച്ചു.
പരമ്പരയിലെ ആദ്യ മത്സരവും ഇന്ത്യ വിജയിച്ചിരുന്നു. ഇതോടെ മൂന്ന് മത്സരങ്ങളുടെ പരമ്പര ഇന്ത്യ സ്വന്തമാക്കി.
Comments