ലക്നൗ : മദ്യപിക്കാൻ പണം നൽകാത്തതിനെ തുടർന്ന് മുത്തശ്ശനെയും മുത്തശ്ശിയെയും കൊലപ്പെടുത്തി യുവാവ്. അറുപത്തിയഞ്ച്കാരനായ പ്രേംശങ്കറും ഭാര്യ ഭവാൻ ദേവിയുമാണ് കൊല്ലപ്പെട്ടത്.ഇവരുടെ കൊച്ചുമകൻ ഹിമേഷ് എന്ന ഇരുപതുകാരനാണ് കൊലപാതകത്തിന് പിന്നിൽ.ഉത്തർപ്രദേശിലെ ദാമ്രി ഗ്രാമത്തിലാണ് സംഭവം. ഇരുവരെയും കൊലപ്പെടുത്തിയ ശേഷം മൃതദേഹം വീടിനുള്ളിൽ ഒളിപ്പിച്ച നിലയിലായിരുന്നു.
പ്രതിയായ ഹിമേഷ് മദ്യത്തിന് അടിമയാണ്. കുറച്ച് നാളുകളായി ഇയാൾ ഡൽഹിയിൽ മുത്തശ്ശനും മുത്തശ്ശിക്കും ഒപ്പമാണ് താമസം. ഈ മാസം 22 ന് വൃദ്ധ ദമ്പതികളും യുവാവും ബന്ധുവിന്റെ കല്യാണത്തിനായി ദാമ്രി ഗ്രാമത്തിൽ എത്തുകയായിരുന്നു. ഇവിടെ വച്ച് യുവാവ് മദ്യപിക്കാനുള്ള പണത്തിനായി വഴക്കുണ്ടാക്കി .
തുടർന്ന് ഇയാൾ വൃദ്ധ ദമ്പതികളെ കൊലപ്പെടുത്തുകയും മൃതദേഹം മുറികളിൽ സൂക്ഷിക്കുകയും ചെയ്തു. ശേഷം യുവാവ് സ്ഥലത്ത് നിന്ന് രക്ഷപ്പെടുകയായിരുന്നു.വൃദ്ധ ദമ്പതികളുടെ മകനാണ് മതാപിതാക്കളെ കണാനില്ലെന്ന് ചൂണ്ടിക്കാട്ടി പോലീസിൽ പരാതി നൽകിയത്. ഇരുവരും ചെറുമകനൊപ്പം കല്യാണത്തിന് പോയതാണെന്ന് പരാതിയിൽ ഇവർ വ്യക്തമാക്കിയിരുന്നു. പരാതിയുടെ അടിസ്ഥാനത്തിൽ നടത്തിയ അന്വേഷണത്തിലാണ് കൊല്ലപ്പെട്ട നിലയിൽ ഇരുവരെയും കണ്ടെത്തിയത്.
വീടിന്റെ രണ്ട് മുറികളിലായി ഭാഗികമായി അഴുകിയ നിലയിലായിരുന്നു മൃതദേഹങ്ങൾ. സംഭവത്തിൽ പോലീസ് എഫ് ഐ ആർ രജിസ്റ്റർ ചെയ്യുകയും അന്വേഷണം ആരംഭിക്കുകയും ചെയ്തതായി ഉദ്യോഗസ്ഥർ അറിയിച്ചു.
