പിറന്നാളിനോടനുബന്ധിച്ച് ആരാധകർക്ക് ആവേശമേകി തന്റെ പുതിയ ചിത്രങ്ങളുടെ പോസ്റ്ററുകൾ പങ്കുവെച്ച് സൂപ്പർസ്റ്റാർ സുരേഷ്ഗോപി. സുരേഷ് ഗോപിയെ നായകനാക്കി രാഹുല്‍ രാമചന്ദ്രന്‍ ഒരുക്കുന്ന ചിത്രത്തിന്റ സെക്കന്റ് ലുക്ക് പോസ്റ്ററാണ് താരം പുറത്ത് വിട്ടിരിക്കുന്നത്. ഇത് വരെ പേരിട്ടിട്ടില്ലാത്ത ചിത്രം SG 251 എന്ന ടാഗില്‍ ആണ് അണിയറ പ്രവർത്തകർ ആരാധകരിലേയ്‌ക്ക് എത്തിച്ചിരിക്കുന്നത്. ഇതുവരെ കാണാത്ത വേറിട്ട ലുക്കിലാണ് താരം പോസ്റ്ററിൽ പ്രത്യക്ഷപ്പെട്ടിരിക്കുന്നത്. ചിത്രത്തിന്റെ ഫസ്റ്റ് ലുക്കും ഏറെ ശ്രദ്ധിക്കപ്പെട്ടിരുന്നു. പുതിയ പോസ്റ്ററിൽ കൈയിൽ രക്തം ചീന്തിയ കത്തിയുമായി ക്രൗര്യം നിറഞ്ഞ നോട്ടവുമായാണ് താരം എത്തിയിരിക്കുന്നത്. മുടിയും കൃതാവും നീട്ടി വളർത്തി വ്യത്യസ്ത ഭാവത്തിലാണ് പോസ്റ്ററിൽ സുരേഷ് ഗോപിയെ കാണാൻ സാധിക്കുന്നത്. എതിറിയല്‍ എന്റര്‍ടെയ്ന്‍മെന്റ്‌സ് നിര്‍മ്മിക്കുന്ന ചിത്രത്തിന്റെ രചന നിര്‍വ്വഹിച്ചിരിക്കുന്നത് സമീന്‍ സലിം ആണ്.
ജിബു ജേക്കബ് സംവിധാനം ചെയ്യുന്ന മേം ഹൂം മൂസയുടെ പോസ്റ്ററും പുറത്ത് വന്നിട്ടുണ്ട്. കൂടാതെ ജയരാജ്-സുരേഷ് ഗോപി കോംബോയിൽ തൊണ്ണൂറുകളിൽ ഇടിമുഴക്കം സൃഷ്ടിച്ച ഹൈവെ എന്ന ചിത്രത്തിന്റെ രണ്ടാം ഭാഗവും പ്രഖ്യാപനം നടത്തിയിട്ടുണ്ട്. വമ്പൻ തിരിച്ചുവരവിനാണ് സുരേഷ് ഗോപി ഒരുങ്ങുന്നത്. വരനെ ആവശ്യമുണ്ട്, കാവൽ എന്നീ സിനിമകളുടെ വിജയത്തിലൂടെ തന്റെ സിംഹാസനത്തിന് ഇളക്കം തട്ടിയിട്ടില്ല എന്ന് താരം തെളിയിച്ചിരുന്നു. തിയറ്ററുകളെ ഇളക്കിമറിക്കാൻ കഴിയുന്ന ഒരു പിടി ചിത്രങ്ങളുമായി താരം വീണ്ടും തിളങ്ങാൻ ഒരുങ്ങുമ്പോൾ ആരാധകരും സിനിമപ്രേമികളും ഒരേപോലെ ആവേശത്തിലാണ്.
ജോഷി- സുരേഷ് ഗോപി കൂട്ടുകെട്ടിലുള്ള പാപ്പനാണ് ഉടനെ തിയറ്ററിൽ എത്തുന്ന സുരേഷ് ഗോപി ചിത്രം. ‘സലാം കാശ്‍മീരി’നു ശേഷം ജോഷിയും സുരേഷ് ഗോപിയും ഒന്നിക്കുന്ന ചിത്രത്തില്‍ ‘എബ്രഹാം മാത്യൂസ് പാപ്പന്‍ ഐപിഎസ്’ എന്ന കഥാപാത്രത്തെയാണ് സുരേഷ് ഗോപി അവതരിപ്പിക്കുന്നത്. ക്രൈം ത്രില്ലര്‍ വിഭാഗത്തില്‍ പെടുന്ന ചിത്രത്തില്‍ നീത പിള്ള, നൈല ഉഷ, ആശ ശരത്ത്, കനിഹ, ചന്ദുനാഥ്, വിജയരാഘവന്‍, ടിനി ടോം, ഷമ്മി തിലകന്‍ തുടങ്ങിയവരും അഭിനയിക്കുന്നു. നവാഗതനായ മാത്യൂസ് തോമസ് സംവിധാനം ചെയ്യുന്ന ഒറ്റക്കൊമ്പനാണ് താരത്തിന്റെ വരാനിരിക്കുന്ന ചിത്രങ്ങളിൽ ആരാധകർ ഏറെ കാത്തിരുക്കുന്ന സിനിമ.
