നിയമസഭാ സ്പീക്കറുടെ നിയമനത്തിനായി മഹാരാഷ്ട്ര ഗവർണർ ഭഗത് സിംഗ് കോഷിയാരി ഉടൻ നടപടിയെടുത്തേക്കുമെന്ന് സൂചന. പ്രോടെം സ്പീക്കറെ നിയമിക്കാനും സാധ്യതയുണ്ട്. ഇതിന് ശേഷം ഗവർണർ വിശ്വാസവോട്ടെടുപ്പിനായി നിയമസഭാ സമ്മേളനം വിളിച്ചേക്കും. അടുത്ത 48 മണിക്കൂറിനുളളിൽ ഗവർണർ നിർണ്ണായക തീരുമാനങ്ങളിലേക്ക് കടക്കാനാണ് സാധ്യത.
മഹാ വികാസ് അഘാഡി (എംവിഎ) സർക്കാരിലെ പ്രതിസന്ധികൾക്കിടയിൽ തിരഞ്ഞെടുപ്പ് കൂടാതെ പ്രോടെം സ്പീക്കറെ നിയമിക്കാൻ ഭാരതീയ ജനതാ പാർട്ടി (ബിജെപി) ഗവർണറോട് ആവശ്യപ്പെട്ടേക്കുമെന്നും വൃത്തങ്ങൾ പറയുന്നു. നിയമസഭാ സ്പീക്കർ ആയിരുന്ന കോൺഗ്രസ് നേതാവ് നാനാ പടോലെ പാർട്ടിയുടെ സംസ്ഥാന ഘടകം അധ്യക്ഷനായി നിയമിതനായതിനെത്തുടർന്ന് സ്ഥാനം രാജിവച്ചു. ഇതിനെത്തുടർന്ന് നിയമസഭാ സ്പീക്കറുടെ കസേര ഒഴിഞ്ഞുകിടക്കുകയായിരുന്നു. സ്പീക്കറുടെ അഭാവത്തിൽ ഡെപ്യൂട്ടി സ്പീക്കർ നർവാരി സിർവാളാണ് തീരുമാനങ്ങൾ എടുക്കുന്നത്.
അതിനിടെ ഏക്നാഥ് ഷിൻഡെ വിഭാഗം വിശ്വാസ വോട്ടെടുപ്പിന് ഗവർണറെ സമീപിക്കും. ഷിൻഡെ വിഭാഗം ബുധനാഴ്ചയ്ക്ക് ശേഷം മുംബൈയിലേക്ക് മടങ്ങാനാണ് സാധ്യത. മഹാരാഷ്ട്രയിലേക്ക് മടങ്ങുന്ന ഏകനാഥ് ഷിൻഡെ ക്യാമ്പ്, വിശ്വാസവോട്ടെടുപ്പ് ആവശ്യപ്പെട്ട് ഗവർണർ ഭഗത് സിംഗ് കോഷിായാരിയെ സമീപിക്കാൻ സാധ്യതയുണ്ടെന്ന് വൃത്തങ്ങൾ അറിയിച്ചു.
ഉദ്ധവ് താക്കറെയുടെ നേതൃത്വത്തിലുള്ള ശിവസേന, നാഷണലിസ്റ്റ് കോൺഗ്രസ് പാർട്ടി (എൻസിപി), കോൺഗ്രസ് എന്നിവയുടെ സഖ്യമായ മഹാ വികാസ് അഘാഡിക്കെതിരെ (എംവിഎ) അവിശ്വാസ വോട്ടിന് ഷിൻഡെ ക്യാമ്പ് നീങ്ങിയേക്കും. ജൂലൈ ആദ്യവാരം നിയമസഭാ സമ്മേളനം വിളിച്ചേക്കും.
ഇന്ത്യൻ ഭരണഘടനയുടെ ആർട്ടിക്കിൾ 175(2) പ്രകാരം ഗവർണർക്ക് സഭ വിളിക്കാനും സർക്കാരിന് ഭൂരിപക്ഷം തെളിയിക്കാൻ വിശ്വാസവോട്ടെടുപ്പ് നടത്താനും അധികാരമുണ്ട്. ഡെപ്യൂട്ടി സ്പീക്കർ നൽകിയ അയോഗ്യതാ നോട്ടീസിന് മറുപടി നൽകാൻ ഷിൻഡെ വിഭാഗം നിയമസഭാംഗങ്ങൾക്ക് ജൂലൈ 12ന് വൈകിട്ട് 5.30 വരെ സുപ്രീം കോടതി ഇടക്കാല ഇളവ് അനുവദിച്ചിരുന്നു.
കോടതി വാദം കേൾക്കൽ ജൂലൈ 11ലേക്ക് മാറ്റി. ഡെപ്യൂട്ടി സ്പീക്കർ, മഹാരാഷ്ട്ര അസംബ്ലി സെക്രട്ടറി, കേന്ദ്രസർക്കാർ എന്നിവർക്ക് നോട്ടീസ് അയച്ച സുപ്രീം കോടതി അഞ്ച് ദിവസത്തിനകം മറുപടി നൽകാൻ ആവശ്യപ്പെട്ടു.
