സർ, അറിവില്ലായ്മ ഒരു തെറ്റല്ല ; ഗണേഷ് കുമാറിനെതിരെ ഫേസ്ബുക്കിൽ പോസ്റ്റിട്ട് ഷമ്മി തിലകൻ

കൊച്ചി : താൻ നാട്ടുകാർക്ക് ശല്യമാണെന്ന ഗണേഷ് കുമാർ എംഎൽഎ യുടെ ആരോപണത്തിന് മറുപടിയുമായി ഷമ്മി തിലകൻ.’ പത്തനാപുരം എംഎൽഎയുടെ അറിവിലേക്കായി പോസ്റ്റ് ചെയ്യുന്നത്. സർ, അറിവില്ലായ്മ ഒരു തെറ്റല്ല..! എന്നാൽ..; അറിഞ്ഞുകൊണ്ട് അറിവില്ലായ്മ നടിക്കുന്നത് അപരാധമാണ്. ആശംസകൾ..! ‘എന്നിങ്ങനെയാണ് ഷമ്മി തിലകൻ ഫേയ്‌സ് ബുക്കിൽ കുറിച്ചത്. കുറിപ്പിനൊപ്പം അഡ്വ. ബോറിസ് പോളിന്റെ പോസ്റ്റും അദ്ദേഹം പങ്കുവച്ചിരുന്നു.

ഗണേഷ് കുമാറിന്റെ ബന്ധുവായ ഡി വൈ എസ് പിയാണ് തനിക്കെതിരെ കേസുകൾ ഉണ്ടാക്കിയത്. ഗണേഷ് കുമാറിന്റെ പ്രസ്താവന അസംബന്ധമാണെന്നും ഷമ്മി കഴിഞ്ഞ ദിവസം പറഞ്ഞിരുന്നു.

ഷമ്മി തിലകൻ കുറിപ്പിനൊപ്പം പങ്കുവെച്ച ഫേസ്ബുക്ക് കുറിപ്പന്റെ പൂർണ രൂപം ഇങ്ങനെ ;

ഗണേഷിന്റേത് പച്ചക്കള്ളം! സത്യം ഷമ്മിക്കൊപ്പം!ഷമ്മി തിലകൻ നാട്ടുകാർക്ക് ശല്യമെന്ന ഗണേഷ്‌കുമാറിന്റെ വാക്കുകൾ പച്ചക്കള്ളം! ശരിയാണ്. ഷമ്മി തിലകൻ ശല്യമായിരുന്നു. നാട്ടുകാർക്കല്ല!പിന്നെ ആർക്കാണ് ശല്യം? നാട്ടുകാരുടെ സൈ്വര്യജീവിതം തടസ്സപ്പെടുത്തിയ സമീപത്തെ ഷോപ്പിംഗ് മാളുകാരന്. മാളുകാരനെതിരെ നടപടിക്ക് മടിച്ച കൊല്ലം കോർപ്പറേഷന്.മാളുകാരനെതിരെ നടപടിയെടുക്കാത്ത മലിനീകരണ നിയന്ത്രണ ബോർഡിന്.മാളുകാരനെതിരെ കേസെടുക്കാതിരുന്ന പോലീസിന്. മാളുകാരന് വേണ്ടി ഷമ്മിക്കും മൈനറായിരുന്ന മകനുമെതിരെ കള്ളക്കേസ് എടുത്ത പോലീസിന്. അങ്ങനെ നിയമലംഘനം നടത്തിയവർക്കെല്ലാം ഷമ്മി ശല്യം തന്നെയായിരുന്നു. പിന്നെ നാട്ടുകാർ…. ആ പ്രദേശത്ത് ആകെ ഒൻപത് കുടുംബങ്ങൾ. അവരും ഷമ്മിയും ഒന്നിച്ച് നിന്നാണ് മാളുകാരനെതിരെ കേസുകൾ നടത്തി വിജയിച്ചത്.അതുകൊണ്ട് ഞാൻ ഉറപ്പിച്ച് പറയുന്നു. ഗണേശൻ പറഞ്ഞത് പച്ചക്കള്ളം! സത്യം ഷമ്മിക്കൊപ്പം. ഇതൊക്കെ തനിക്കെങ്ങനെയറിയാം എന്ന് എന്നോട് ചോദിച്ച് സമയം കളയണ്ട. ആ കേസുകളിൽ ഷമ്മി തിലകന്റെയും മലയാളത്തിന്റെ മഹാനടനായ സുരേന്ദ്രനാഥ തിലകന്റേയും വക്കാലത്ത് എനിക്കായിരുന്നു.- അഡ്വ ബോറിസ് പോൾ