അഹമ്മദാബാദ്: ഗുജറാത്തിലെ മഹാപ്രഭു ജഗന്നാഥ ക്ഷേത്രത്തിൽ ദർശനം നടത്തി കേന്ദ്ര ആഭ്യന്തര മന്ത്രി അമിത് ഷാ. പുലർച്ചെയായിരുന്നു അദ്ദേഹത്തിന്റെ ക്ഷേത്ര ദർശനം. വിവിധ വഴിപാടുകളും അദ്ദേഹം നടത്തി.
ട്വിറ്ററിലൂടെയാണ് അദ്ദേഹം ക്ഷേത്ര ദർശനത്തിന്റെ വിവരം അറിയിച്ചത്. ക്ഷേത്ര ദർശനത്തിന്റെ ചിത്രങ്ങളും അദ്ദേഹം ട്വിറ്ററിൽ പങ്കുവെച്ചിട്ടുണ്ട്. ക്ഷേത്രത്തിലെ പ്രധാന പൂജയായ മംഗള ആരതിയിൽ അദ്ദേഹം പങ്കെടുത്തു. ക്ഷേത്രത്തിലെ മറ്റ് പൂജകളിലും പങ്കെടുത്ത് ക്ഷേത്രം അധികൃതരുമായി സംവദിച്ച ശേഷമായിരുന്നു അദ്ദേഹം തിരികെ മടങ്ങിയത്.
ഒഡീഷയിലെ പുരി ജഗന്നാഥ ക്ഷേത്രത്തിൽ ഇന്നാണ് രഥയാത്ര മഹോത്സവം. ഇതിന്റെ പശ്ചാത്തലത്തിലായിരുന്നു അഹമ്മദാബാദിലെ ക്ഷേത്രത്തിലെത്തി അദ്ദേഹം ദർശനം നടത്തിയത്.
അഹമ്മദാബാദിലെ ജഗന്നാഥ ക്ഷേത്രത്തിലെ മംഗള ആരതിയിൽ പങ്കെടുത്ത് മഹാപ്രഭു ജഗന്നാഥന്റെ അനുഗ്രഹം വാങ്ങിയതായി അമിത് ഷാ ട്വിറ്ററിൽ കുറിച്ചു. രഥയാത്രാ വേളയിൽ ഇവിടെ എത്തി ദർശനം വാങ്ങാൻ കഴിഞ്ഞത് വ്യത്യസ്തമായ അനുഭവം ആയിരുന്നു. ദൈവം എല്ലാവരിലും അനുഗ്രഹം ചൊരിയട്ടെയെന്നും അദ്ദേഹം ട്വീറ്റ് ചെയ്തു.
