കൊച്ചി: ഇര തേടിയെത്തിയ മലമ്പാമ്പ് കൊച്ചി നഗരത്തിലെ മരത്തിന് മുകളിൽ. എറണാകുളം കണയന്നൂർ താലൂക്ക് ഓഫീസിന്റെ മുന്നിലെ മരത്തിലാണ് മലമ്പാമ്പ് കയറിപ്പറ്റിയത്. 20 മീറ്റർ ഉയരത്തിലുള്ള കൊമ്പിൽ ചുരുണ്ടുകൂടിയിരിക്കുകയാണ് കക്ഷി.
അണ്ണാനും പക്ഷികളും അസ്വാഭാവികമായി ശബ്ദമുണ്ടാക്കുന്നത് കേട്ടാണ് സർക്കാർ ഓഫീസിലെ ജീവനക്കാർ മരത്തിന് മുകളിൽ എന്താണെന്ന് പരിശോധിച്ചത്. ഉയരമുള്ളൊരു കൊമ്പിൽ മലമ്പാമ്പ് ചുരുണ്ടിരിക്കുന്നതായിരുന്നു തുടർന്ന് കണ്ട കാഴ്ച. മരത്തിന് മുകളിലേക്ക് മലമ്പാമ്പ് ഇരതേടി കയറിയതാകുമെന്നാണ് കരുതുന്നത്.
പോലീസും ഫയർ ഫോഴ്‌സുമെത്തിയെങ്കിലും മലമ്പാമ്പിനെ ഇതുവരെ പിടികൂടാനായിട്ടില്ല. വനം വകുപ്പ് ഉദ്യോഗസ്ഥർ കൂടി എത്തിയ ശേഷം മലമ്പാമ്പിനെ താഴെയിറക്കാനാകുമെന്നാണ് നിഗമനം. രക്ഷാപ്രവർത്തനത്തിന് മഴയും വില്ലനാകുന്നുണ്ടെന്ന് എറണാകുളം വില്ലേജ് ഓഫീസർ വിസി രാജേന്ദ്രൻ പ്രതികരിച്ചു.
