മലയാളി താരം അനുപമ പരമേശ്വരൻ നായികയാകുന്ന തെലുങ്ക് ചിത്രം ബട്ടർഫ്ലൈയുടെ റിലീസ് ഒടിടിയിലൂടെ എന്ന് സൂചന. ചിത്രത്തിന്റെ തീയേറ്റർ റിലീസ് ഒഴിവാക്കി ഡിസ്നി പ്ലസ് ഹോട്സ്റ്റാറിലൂടെ റീലീസ് ചെയ്യാനാണ് അണിയറ പ്രവർത്തകരുടെ തീരുമാനം എന്നാണ് റിപ്പോർട്ടുകൾ. രവി പ്രകാശ് ബോദപതി, പ്രസാദ് തിരുവല്ലൂരി എന്നിവർ ചേർന്ന് നിർമ്മിക്കുന്ന ചിത്രം സംവിധാനം ചെയ്തിരിക്കുന്നത് ഘന്ത സതീഷ് ബാബുവാണ് .
പൂർണ്ണമായി ഒരു ത്രില്ലർ ചിത്രമായ ബട്ടർഫ്ലൈയിൽ കേന്ദ്ര കഥാപാത്രത്തെ അവതരിപ്പിക്കുന്നത് അനുപമയാണ്. പതിവിൽ നിന്നും വ്യത്യസ്തമായി അമ്മയായി ആണ് താരം എത്തുന്നത്. ചിത്രത്തിന്റെ തുടക്കം മുതൽ അവസാനം വരെ അനുപയുടെ കഥാപാത്രത്തെ ചുറ്റിപ്പറ്റിയാണ് കഥ നീങ്ങുന്നത്. ‘ നിങ്ങളുടെ കണ്ണുകളെയും മനസ്സിനെയും വിശ്വസിക്കരുതെന്നാണ്’ ചിത്രത്തിന്റെ ടീസർ സബ് ടൈറ്റിലുകൾ തന്നെ പറയുന്നത് .
അനുപമയ്ക്ക് പുറമെ നിഹാൽ കോദാട്ടി, ഭൂമിക ചൗള എന്നിവരും ചിത്രത്തിൽ സഹകഥാപാത്രങ്ങളെ അവതരിപ്പിക്കുന്നുണ്ട്. സംവിധായകൻ ഘന്ത സതീഷ് ബാബു തന്നെ തിരക്കഥയെഴുതുമ്പോൾ സംഭാഷണ രചന ദക്ഷിൺ ശ്രീനിവാസാണ്. ജനറേഷൻ നെക്സ്റ്റ് മൂവിസാണ് ബാനർ.അനന്ത ശ്രീരാമാണ് ചിത്രത്തിന്റെ ഗാനരചയിതാവ്. കെ എസ് ചിത്രയ്ക്ക് പുറമേ ചിത്രത്തിൽ അനുപമ പരമേശ്വരനും ഗാനം ആലപിക്കുന്നു.
നാരായണയാണ് ചിത്രത്തിന്റെ എക്സിക്യുട്ടീവ് പ്രൊഡ്യൂസർ.
ചിത്രത്തിന്റെ സംഗീത സംവിധാനം അർവിസാണ് . പാഞ്ചജന്യ പൊത്തരാജുവാണ് പ്രൊഡക്ഷൻ കൺട്രോളർ. അനുപമ ഇപ്പോൾ സജീവം തെലുങ്ക് സിനിമകളിലാണ്. വിവിധ ഭാഷകളിലായി നിരവധി ആരാധകരാണ് താരത്തിന് ഉള്ളത്.
