ഗോവ ഗവർണർ പി.എസ്.ശ്രീധരൻപിള്ളയുടെ പുതിയ പുസ്തകം പ്രകാശനം ചെയ്തു. സംവിധായകനും തിരക്കഥാകൃത്തും എഴുത്തുകാരനുമായ എം.ടി വാസുദേവൻനായരാണ് പുസ്തകത്തിന്റെ പ്രകാശനം നിർവ്വഹിച്ചത്. ‘ലോക്ഡൗൺ കവിതകൾ’ എന്ന കവിതാ സമാഹാരം ശ്രീധരൻപിള്ളയുടെ 149 -ആമത് പുസ്തകമാണ്.
മിസോറാം ഗവർണറായി ഇരുന്ന കാലഘട്ടത്തിൽ എഴുതിയ 25 കവിതകൾ അടങ്ങിയ പുസ്തകമാണ് ‘ലോക്ഡൗൺ കവിതകൾ’. ‘ആ വിരലുകൾ മറന്നോ’ എന്ന ദീർഘ കവിതയാണ് പുസ്തകത്തിലെ പ്രധാന കവിത. ഔറംഗസീബിന്റെ കാലത്ത് പിതാവ് ഷാജഹാനെ തടവിലാക്കി ശില്പികളുടെ വിരലുകൾ അറുത്തു മാറ്റിയ സംഭവത്തെ അടിസ്ഥാനമാക്കിയുള്ളതാണ് ‘ആ വിരലുകൾ മറന്നോ’ എന്ന കവിത.
മിസോറാമിന്റെ പ്രകൃതി ഭംഗിയും ലോക് ഡൗൺ കാലത്തിന്റെ ദൈന്യതയാർന്ന ചിത്രങ്ങളും അടങ്ങുന്നതാണ് സമാഹാരത്തിലെ മറ്റ് കവിതകൾ. കോഴിക്കോട് എം.പി എം.കെ.രാഘവനാണ് പുസ്തകം ഏറ്റുവാങ്ങിയത്. തൃശൂർ കറന്റ് ബുക്സാണ് പ്രസാധകർ. എം.ടി വാസുദേവൻനായരുടെ സിതാര എന്ന വസതിയിൽ വെച്ചാണ് പുസ്ത പ്രകാശനം നടന്നത്. കറന്റ് ബുക്സ് എം.ഡി. പെപ്പിൻ തോമസ്, ശ്രീശൈലം ഉണ്ണികൃഷ്ണൻ എന്നിവരും ചടങ്ങിൽ പങ്കാളികളായി.
