ന്യൂഡൽഹി : പ്രധാനമന്ത്രി നരേന്ദ്ര മോദിക്കൊപ്പം അത്താഴവിരുന്നിൽ പങ്കെടുക്കാൻ ബിജെപി എംപിമാർക്ക് ക്ഷണം. രാഷ്ട്രപതി തിരഞ്ഞെടുപ്പിന് മുന്നോടിയായി നടക്കുന്ന വിരുന്നിൽ കേന്ദ്ര ആഭ്യന്തര മന്ത്രി അമിത് ഷാ, ബിജെപി ദേശീയ അദ്ധ്യക്ഷൻ ജെപി നദ്ദ എന്നിവരും പങ്കെടുക്കും. ഈ പരിപാടിയിലേക്കാണ് എംപിമാരെയും ക്ഷണിച്ചിരിക്കുന്നത്.
ശനിയാഴ്ച വൈകീട്ട് 6.30 പാർലമെന്റ് ഓഡിറ്റോറിയത്തിൽ വെച്ച് പ്രത്യേക യോഗം നടക്കും. യോഗത്തിൽ പങ്കെടുക്കാനും എംപിമാർക്ക് നിർദ്ദേശമുണ്ട്. തിരഞ്ഞെടുപ്പ് പ്രക്രിയയെക്കുറിച്ച് ഈ യോഗത്തിൽ വിശദീകരിക്കും. അടുത്ത ദിവസം എൻഡിഎ സഖ്യത്തിലെ എല്ലാ മന്ത്രിമാരും എംപിമാരും ചേരുന്ന യോഗം നടക്കും.
വനവാസി സമുദായത്തിൽ നിന്നുള്ള ദ്രൗപതി മുർമുവാണ് എൻഡിഎ സഖ്യത്തിന്റെ രാഷ്ട്രപതി സ്ഥാനാർത്ഥി. രാജ്യത്തെ നിരവധി രാഷ്ട്രീയ പാർട്ടികൾ മുർമുവിന് പിന്തുണയറിയിച്ചിട്ടുണ്ട്. മഹാരാഷ്ട്ര മുൻ മുഖ്യമന്ത്രി ഉദ്ധവ് താക്കറെയാണ് അവസാനമായി മുർമുവിന് പിന്തുണ പ്രഖ്യാപിച്ചത്. തിരഞ്ഞെടുക്കപ്പെട്ടാൽ, പ്രസിഡന്റാകുന്ന ആദ്യ വനവാസി വനിതയാകും മുർമു.
യശ്വന്ത് സിൻഹയെയാണ് പ്രതിപക്ഷ സ്ഥാനാർത്ഥിയായി തിരഞ്ഞെടുത്തിരിക്കുന്നത്. തിങ്കളാഴ്ച രാഷ്ട്രപതി തിരഞ്ഞെടുപ്പ് നടക്കും. ഇലക്ടറൽ കോളേജിലെ അംഗങ്ങളാണ് പ്രസിഡന്റിനെ തിരഞ്ഞെടുക്കുന്നത്.
