കൊല്ലം : കരുനാഗപ്പള്ളിയിൽ നിന്ന് മോഷണം പോയ ആംബുലൻസ് കൊച്ചിയിൽ കണ്ടെത്തി. കരുനാഗപ്പള്ളി താലൂക്ക് ആശുപത്രിക്ക് മുന്നിൽ നിന്ന് കാണാതായ ആംബുലൻസാണ് എറണാകുളം സൗത്ത് റെയിൽവേ സ്റ്റേഷന് സമീപത്ത് നിന്ന് കണ്ടെത്തിയത്. പിന്നാലെ പ്രതിയെ കണ്ടെത്താനുളള അന്വേഷണം പോലീസ് ഊർജ്ജിതമാക്കിയിരിക്കുകയാണ്.
കരുനാഗപ്പള്ളി സ്വദേശി ജോതിഷിന്റെയാണ് ആബുലൻസ്. ഇന്ന് പുലർച്ചെ രണ്ട് മണിക്കാണ് സംഭവം. ആശുപത്രിക്ക് മുന്നിൽ നിന്ന് ചായ കുടിക്കാൻ ആംബുലൻസിൽ നിന്ന് ഡ്രൈവർ ഇറങ്ങുകയായിരുന്നു. ആംബുലൻസിന്റെ താക്കോൽ ഊരിയെടുത്തിരുന്നില്ല. ഈ തക്കം നോക്കിയാണ് മോഷ്ടാവ് ആംബുലൻസുമായി കടന്ന് കളഞ്ഞത്.
അപ്പോൾ തന്നെ ജോതിഷ് പോലീസിൽ പരാതി നൽകി. എല്ലാവരും തിരച്ചിൽ ആരംഭിച്ചു. എറണാകുളം ഹൈക്കോടതിക്ക് സമീപം ആംബുലൻസ് കണ്ടെന്ന് വിവരം ലഭിച്ചു. തുടർന്ന് നടത്തിയ തിരച്ചിലിലാണ് ആംബുലൻസ് കണ്ടെത്തിയത്.
ആംബുലൻസിൽ നിന്ന് ഒന്നും മോഷണം പോയിട്ടില്ല. എന്തെങ്കിലും കടത്താനാണോ ഇത് ഉപയോഗിച്ചത് എന്ന് പോലീസ് സംശയിക്കുന്നു. വാഹനം സഞ്ചരിച്ച വഴികൾ കേന്ദ്രീകരിച്ച് അന്വേഷണം നടത്തിവരികയാണ്.
