കൊല്ലം : ഗർഭിണിയായ മകളെ നടുറോഡിലിട്ട് ചവിട്ടിക്കൊല്ലാൻ ശ്രമിച്ച പിതാവ് അറസ്റ്റിൽ. കിളിമാനൂർ കൊപ്പം സ്വദേശി സതീശനാണ് അറസ്റ്റിലായത്. സ്കൂട്ടറിൽ ജോലിക്ക് പോകുന്നതിനിടെ ഇയ്യക്കോട് ജംഗ്ഷന് സമീപമായിരുന്നു സംഭവം.
സതീശൻ സ്വന്തം മകളെ വലിച്ചിഴച്ച് നടുറോഡിലിട്ട് ആക്രമിക്കുകയായിരുന്നു. വാഹനം തടഞ്ഞു നിർത്തിയ അച്ഛൻ യുവതിയെ സ്കൂട്ടറിൽ നിന്ന് വലിച്ച് താഴെയിട്ടു. തുടർന്ന് വയറ്റിൽ ചവിട്ടുകയും ചെയ്തു. കുതറിയോടിയ മകൾ തൊട്ടടുത്ത വീട്ടിലേക്ക് ഓടിക്കയറിയെങ്കിലും പിന്നാലെ ചെന്ന് സതീശൻ ആക്രമിച്ചു.
ഇത് കണ്ട് ഓടിയെത്തിയ നാട്ടുകാരാണ് പ്രതിയെ പിടിച്ചുമാറ്റി യുവതിയെ രക്ഷിച്ചത്. തുടർന്ന് ഇയാളെ കടക്കൽ പോലീസ് അറസ്റ്റ് ചെയ്തു. രണ്ട് കൊലപാതക കേസുകളിൽ പ്രതിയാണ് സതീശൻ. ഭാര്യ വീടുവിട്ട് പോകാൻ കാരണം മകളാണെന്ന് ആരോപിച്ചായിരുന്നു ആക്രമണം. കോടതിയിൽ ഹാജരാക്കിയ പ്രതിയെ റിമാന്റ് ചെയ്തു. പരിക്കേറ്റ യുവതിയെ കടയ്ക്കൽ താലൂക്ക് ആശുപത്രിയിൽ പ്രവേശിപ്പിച്ചു.
Comments