തിരുവനന്തപുരം : തൊണ്ടി മുതലിൽ കൃത്രിമം കാണിച്ചെന്ന കേസിൽ വിചാരണയ്ക്ക് ഹാജരാകാതെ മുങ്ങിനടന്നതായി ആരോപണം ഉയർന്ന മന്ത്രി ആന്റണി രാജുവിനെ ട്രോളി മുൻ എംഎൽഎ വിടി ബൽറാം. ആന്റണി രാജു രാജിവെയ്ക്കുമ്പോൾ ഉപയോഗിക്കേണ്ട ക്യാപ്സ്യൂൾ പങ്കുവെച്ചുകൊണ്ടാണ് പരിഹാസം.
” വേറൊന്നിന്റേയും പേരിലല്ലല്ലോ… ജട്ടി കട്ടതിനല്ലേ! അഭിമാനിക്കുന്നു സഖാവേ നിങ്ങളെയോർത്ത്. രാജി വയ്ക്കുമ്പോൾ ഉപയോഗിക്കാനുള്ള ക്യാപ്സ്യൂൾ” എന്ന് വിടി ബൽറാം ഫേസ്ബുക്കിൽ കുറിച്ചു.
മന്ത്രി ആന്റണി രാജു പ്രതിയായ 28 വർഷങ്ങൾക്ക് മുൻപുള്ള കേസിന്റെ രേഖകളാണ് പുറത്തുവന്നിരിക്കുന്നത്. ലഹരിക്കേസ് പ്രതിയെ രക്ഷിക്കാൻ, കോടതിയിലെ തൊണ്ടി സെക്ഷൻ ക്ലാർക്ക് കെ.എസ്. ജോസിനെ കൂട്ടുപിടിച്ച് തൊണ്ടിമുതലായ അടിവസ്ത്രം മാറ്റിവെക്കുകയായിരുന്നു. പതിനാറ് വർഷമായി മന്ത്രിക്കെതിരെ കേസ് രജിസ്റ്റർ ചെയ്തിട്ടെങ്കിലും ഇതുവരെ ഒരു തവണ പോലും കേസിന്റെ വിചാരണയക്കായി മന്ത്രി കോടതിയിൽ ഹാജരായിട്ടില്ല.
കോടതിയെ ചതിച്ചു, ഗൂഡാലോചന നടത്തി എന്നതടക്കം അതീവ ഗുരുതരമായ ആറ് കുറ്റങ്ങളാണ് മന്ത്രിക്കെതിരെ ഉൾപ്പെടെ ചുമത്തിയിരിക്കുന്നത്. ഓഗസ്റ്റ് നാലിന് കേസ് ഇരുപത്തിമൂന്നാം തവണയാണ് പരിഗണിക്കുന്നത്. അന്നെങ്കിലും മന്ത്രി ഹാജരാകുമോ എന്ന ചോദ്യങ്ങളാണ് ഇപ്പോൾ ഉയരുന്നത്.
Comments