ശ്രീനഗർ: ഒരു സൈക്കിളെടുത്ത് ലോകത്തെ മുഴുവൻ കാണാൻ ഇറങ്ങി പുറപ്പെട്ട വിദേശ ദമ്പതികളാണ് സ്റ്റീഫൻ ഊബ്ലിംഗറും അദ്ദേഹത്തിന്റെ ഭാര്യ തെരേസയും. ഇപ്പോൾ കശ്മീർ സന്ദർശന വേളയിലാണ് ഇരുവരും. ഇന്ത്യയിലെത്തിയതും കശ്മീർ സന്ദർശിച്ചപ്പോഴുണ്ടായ അനുഭവങ്ങളും ഒരു വീഡിയോയിലൂടെ പങ്കുവെച്ചിരിക്കുകയാണ് ദമ്പതികൾ. ഏതൊരു വിനോദസഞ്ചാരിക്കും 100 ശതമാനം സുരക്ഷിതമായ സ്ഥലമാണ് കശ്മീരെന്നും അതിഥികളെ ഏറ്റവും നന്നായി സ്വീകരിക്കുന്ന ജനതയാണ് ഇവിടെയുള്ളതെന്നും അവർ അഭിപ്രായപ്പെട്ടു.
പരിസ്ഥിതി സൗഹൃദമായ രീതിയിൽ സൈക്കിളിലൂടെയാണ് ഇരുവരുടെയും യാത്ര. കശ്മീരിലും സൈക്കിളിൽ തന്നെയാണ് ഇരുവരും വിനോദസഞ്ചാര മേഖലകളെല്ലാം സന്ദർശിച്ചത്. ഇതിനിടെയുളള ദൃശ്യങ്ങൾ പകർത്തി പങ്കുവെച്ച വീഡിയോയിലാണ് മറക്കാനാകാത്ത അനുഭവം സമ്മാനിച്ച കശ്മീരിനെക്കുറിച്ച് ദമ്പതികൾ വാചാലരായത്.
Travelling around the globe, Stefan Ublinger and his wife, Theresa are currently in #Kashmir and the couple say that the place is safe for visitors.
Using eco-friendly travelling mode, bicycles, the couple is on a whirlwind tour of the world. pic.twitter.com/6G48cLotua
— IANS (@ians_india) July 16, 2022
”ഇവിടെയെത്തിയതിൽ ഞങ്ങൾ അതീവ സന്തോഷത്തിലാണ്. ഇവിടുത്തെ പ്രകൃതി അതിമനോഹരമാണ്. കശ്മീരിലെ ജനങ്ങൾ വളരെയധികം സ്നേഹമുള്ളവരും അതിഥികളെ നന്നായി സ്വീകരിക്കുന്നവരുമാണ്. ഇവിടെയെത്തുന്നത് വരെ അമർനാഥ് യാത്രയെക്കുറിച്ച് അറിയില്ലായിരുന്നു. ഒരുപാട് പേർ ഇവിടെ യാത്രയ്ക്കായി എത്തിയിട്ടുണ്ട്. ചിലപ്പോഴൊക്കെ പല മാദ്ധ്യമങ്ങളും കശ്മീർ സുരക്ഷിതമല്ലെന്ന് ചൂണ്ടിക്കാട്ടാറുണ്ട്. എന്നാൽ ഞങ്ങൾക്ക് ഇപ്പോൾ ഉറപ്പിച്ച് പറയാൻ കഴിയും, ഇവിടെ വിനോദസഞ്ചാരികൾ 100 ശതമാനം സുരക്ഷിതരാണ്. കശ്മീരിലേക്ക് വരൂ.. ഇവിടം അതിമനോഹരമാണ്.. സുരക്ഷിതമാണ്.. നിങ്ങൾക്കാവശ്യമുള്ള എല്ലാമുണ്ടിവിടെ.. മനോഹരിയായ പ്രകൃതി, നല്ല ജനങ്ങൾ, നല്ല ഭൂപ്രദേശങ്ങൾ, കാഴ്ചകൾ….” യൂട്യൂബിൽ പങ്കുവെച്ച വീഡിയോയിൽ സ്റ്റീഫൻ ഊബ്ലിംഗറും തെരേസയും ഇപ്രകാരം പറഞ്ഞു. കശ്മീരിനെക്കുറിച്ച് വിദേശദമ്പതികൾ പറഞ്ഞവാക്കുകൾ ഇതോടെ വലിയ ശ്രദ്ധയാണ് പിടിച്ചുപറ്റിയത്. കശ്മീരിലേക്ക് വരാൻ ഏറെ മോഹിപ്പിച്ചതായി പലരും ഇവരുടെ വീഡിയോയ്ക്ക് താഴെ പ്രതികരണങ്ങളായി അറിയിച്ചു.
