ന്യൂഡൽഹി : നേവൽ ഇന്നോവേഷൻ ഇൻഡൈജനൈസേഷൻ ഓർഗനൈസേഷൻ(NIIO) സെമിനാറിൽ പ്രധാനമന്ത്രി രാജ്യത്തെ അഭിസംബോധന ചെയ്യും. ഡൽഹിയിലെ ഡോ അംബേദ്കർ ഇന്റർനാഷണൽ സെന്ററിൽ വെച്ച് നടക്കുന്ന പരിപാടിയിൽ സ്വാവലംബൻ എന്ന വിഷയത്തിലായിരിക്കും പ്രധാനമന്ത്രി സംസാരിക്കുക. ആത്മനിർഭർ ഭാരതത്തിന്റെ പ്രാധാന്യത്തെ കുറിച്ചും, അതിനുവേണ്ടി രാജ്യം സ്വയം പര്യാപ്തത കൈവരിക്കേണ്ട പ്രതിരോധ മേഖലയെക്കുറിച്ചും അദ്ദേഹം സംസാരിക്കും. പ്രധാനമന്ത്രിയുടെ ഓഫീസാണ് ഇക്കാര്യം അറിയിച്ചത്.
ഇന്ത്യൻ നാവികസേനയിലെ തദ്ദേശീയ സാങ്കേതിക വിദ്യയുടെ വളർച്ചക്കും ഉന്നമനത്തിനും കൂടുതൽ ഊർജ്ജം പകരുന്നതിനായി സ്പ്രിന്റ് ചലഞ്ചുകൾ പ്രധാനമന്ത്രി പരിപാടിയിൽ അനാവരണം ചെയ്യും . ഡിഫൻസ് ഇന്നോവേഷൻ ഓർഗനൈസേഷനുമായി ചേർന്നുകൊണ്ട് ഇന്ത്യൻ നാവിക സേനയിൽ കുറഞ്ഞത് 75 തദ്ദേശീയ സാങ്കേതിക വിദ്യകളും ഉൽപ്പന്നങ്ങളും ഉൾപ്പെടുത്താൻ NIIO ഉദ്ദേശിക്കുന്നുണ്ട് . ഈ പദ്ധതിക്ക് സ്പ്രിന്റ് എന്നാണ് പേരിട്ടിരിക്കുന്നത് .
പ്രതിരോധ മേഖലയിൽ സ്വയം പര്യാപ്തത നേടുന്നതിന് വേണ്ടി രാജ്യത്തിനകത്തുള്ള വ്യവസായത്തെയും അക്കാദമിക് സംവിധാനങ്ങളെയും ഈ ഉദ്യമത്തിൽ പങ്കാളികളാക്കുക എന്നതാണ് സെമിനാറിന്റെ പ്രധാന ലക്ഷ്യം .ഇന്നും നാളെയും നടക്കുന്ന പരിപാടി പ്രതിരോധം , അക്കാദമിക് , സേവനം തുടങ്ങിയ നിരവധി മേഖലകളിൽ പ്രവർത്തിക്കുന്നവരെ ഒന്നിച്ച് കൊണ്ടുവന്ന് അവരുടെ ആശയങ്ങൾ പ്രതിരോധ മേഖലയിൽ ഉപയോഗപ്പെടുത്തുക എന്നതാണ് ഉദ്ദേശിക്കുന്നത് . പ്രധാനമായും ഇന്നോവേഷൻ , ആയുധനിർമ്മാണം, സ്വദേശിവൽക്കരണം, വ്യോമയാനം തുടങ്ങിയ വിഷയങ്ങളിലായിരിക്കും സെഷനുകൾ നടക്കുക .
ഇന്ത്യൻ മഹാ സമുദ്രത്തിലേക്ക് കൂടുതൽ വ്യാപിക്കേണ്ട സാഹചര്യത്തെ കുറിച്ചും ചർച്ച നടക്കും. എല്ലാവരുടെയും സുരക്ഷയും വളർച്ചയും ലക്ഷ്യമിട്ടുകൊണ്ടും പദ്ധതികൾ നടപ്പിലാക്കും.
