കൊച്ചി : കിഫ്ബി സാമ്പത്തിക ഇടപാടുകളുമായി ബന്ധപ്പെട്ട കേസിൽ ചോദ്യം ചെയ്യലിനായി ഇഡിക്ക് മുന്നിൽ ഹാജരാകില്ലെന്ന് മുൻ ധനമന്ത്രി തോമസ് ഐസക്ക്. ഇഡിയുടെ നോട്ടീസ് ലഭിച്ചുവെന്നും എന്നാൽ ഇന്ന് ഹാജരാകാനാകില്ലെന്നുമാണ് തോമസ് ഐസക്ക് പറഞ്ഞത്. ഇഎംഎസ് അക്കാദമിയിൽ ക്ലാസുകൾ ഉള്ളതിനാൽ ചോദ്യം ചെയ്യലിന് ഹാജരാകാൻ കഴിയില്ലെന്നാണ് വിശദീകരണം. ഈ സാഹചര്യത്തിൽ തോമസ് ഐസക്കിന് വീണ്ടും നോട്ടീസ് നൽകാനാണ് ഇഡിയുടെ നീക്കം.
കിഫ്ബി സാമ്പത്തിക ഇടപാടുമായി ബന്ധപ്പെട്ട കേസിലെ അന്വേഷണത്തിന്റെ ഭാഗമായുളള ചോദ്യം ചെയ്യലിന് കൊച്ചിയിലെ ഇഡി ഓഫീസിൽ എത്താനായിരുന്നു നിർദ്ദേശം. എന്നാൽ ആദ്യം നോട്ടീസ് ലഭിച്ചില്ലെന്ന് ആരോപിച്ച് രംഗത്തെത്തിയ ധനമന്ത്രി, പിന്നീട് നോട്ടീസ് ലഭിച്ചെന്നും ഹാജരാകാൻ സാധിക്കില്ലെന്നും പറഞ്ഞു.
വിദേശ വിനിമയ ചട്ടം ലംഘിച്ച് കേരളത്തിലേക്ക് നിയമ ലംഘനത്തിലൂടെ പണം കൊണ്ടു വന്നു എന്നതാണ് കേസ്. ഫെമ ആക്ടിലെ നിയമലംഘനം ചൂണ്ടിക്കാട്ടിയാണ് നോട്ടീസ്. കേന്ദ്ര ധനകാര്യ മന്ത്രി നിർമ്മല സീതാരാമൻ ഒരു വർഷം മുൻപ് ഈ നിയമലംഘനം ചൂണ്ടിക്കാട്ടിയിരുന്നു. ആദായ നികുതി വകുപ്പും ഈ കേസിൽ അന്വേഷണം നടത്തിയിരുന്നു.
