പലർക്കും മടിയുള്ള ജോലിയാണ് ശരീരം വൃത്തിയാക്കൽ, പ്രത്യേകിച്ചും പല്ല്. ദിവസത്തിൽ രണ്ട് നേരം പല്ല് തേക്കണമെന്ന് ഡോക്ടർമാർ നിർദ്ദേശിക്കുന്നുണ്ടെങ്കിലും അത് ചെയ്യാനുള്ള മടികൊണ്ട് ആരും ആ പണിക്ക് പോകാറില്ല. എന്നാൽ ഇനി ആ ജോലിയോർത്ത് ആരും വിഷമിക്കേണ്ട, അതിന് തയ്യാറായി എത്തിയിരിക്കുകയാണ് കുഞ്ഞൻ റോബോട്ടുകളായ മൈക്രോ റോബോട്ടുകൾ. ഈ റോബോട്ടുകളെ ഉപയോഗിച്ച് പല്ല് വൃത്തിയാക്കാൻ സാധിക്കുമെന്ന് പെൻസിൽവാനിയ സർവകലാശാലയിലെ ഗവേഷകർ അവകാശപ്പെടുന്നു. ദിവ്യാംഗർക്കും കിടപ്പ് രോഗികൾക്കും ഇത് ഏറെ സഹായമാകുമെന്നാണ് കണ്ടെത്തൽ.
അയേൺ ഓക്സൈഡ് നാനോപാർട്ടിക്കിളുകൾ ഉപയോഗിച്ചാണ് മൈക്രോ റോബോട്ടുകൾ നിർമ്മിച്ചിരിക്കുന്നത്. കാന്തിക ശേഷി ഉപയോഗിച്ച് ഇവയുടെ ചലനം നിയന്ത്രിക്കാനാകും. ടൂത്ത് ബ്രഷുകൾക്ക് സമാനമായ നാരുകൾ ഉള്ളതിനാൽ എളുപ്പത്തിൽ വൃത്തിയാക്കാനും സാധിക്കും. നീളമേറിയ സ്ട്രിംഗുകൾ കൊണ്ടാണ് ഇവ സജ്ജീകരിച്ചിരിക്കുന്നത്.
മൈക്രോ റോബോട്ടിലെ നാനോ പാർട്ടിക്കിൾസിനെ കാന്തിക ശേഷി ഉപയോഗിച്ച് രൂപം മാറ്റാനും നിയന്ത്രിക്കാനും കഴിയുമെന്ന് ഗവേഷകരിൽ ഒരാളായ അഡ്വേഡ് സ്റ്റേഗർ പറയുന്നു. നീളം കൂട്ടാനും കുറയ്ക്കാനും വായിലെ ചെറിയ, ഇടുങ്ങിയ പ്രദേശങ്ങൾ വൃത്തിയാക്കാനും മൈക്രോ റോബോട്ടുകളെക്കൊണ്ട് സാധിക്കും. മൈക്രോ റോബോട്ട് ടൂത്ത്ബ്രഷിന്റെ പരീക്ഷണം മനുഷ്യന്റെ പല്ലിൽ നടത്തിയിരുന്നു. ഈ പരീക്ഷണങ്ങൾ വിജയിച്ചു. ആന്റിമൈക്രോബൈൽസ് ഉപയോഗിച്ച് അപകടകരമായ ബാക്ടീരിയകളെ കൊല്ലാനുള്ള ശേഷിയും ഈ മൈക്രോബോട്ടുകൾക്കുണ്ടെന്നും ഗവേഷകർ പറയുന്നു.
