ഗായിക അമൃത സുരേഷും സംഗീത സംവിധായകൻ ഗോപി സുന്ദറും തമ്മിലുള്ള വിവാഹ വാർത്ത സമൂഹമാദ്ധ്യമങ്ങളിൽ വലിയ ചർച്ചയ്ക്ക് വഴിയൊരുക്കിയിരുന്നു. ഇരുവരും പുഷ്പഹാരമണിഞ്ഞ് നിൽക്കുന്ന ചിത്രം ഗോപി സുന്ദർ പങ്കുവെച്ചതോടെയാണ് വിവാഹം കഴിഞ്ഞുവെന്ന രീതിയിൽ വാർത്ത പ്രചരിച്ചത്. സിന്ദൂരമണിഞ്ഞ് നിൽക്കുന്ന അമൃതയെ പോസ്റ്റിൽ കണ്ടതോടെ വിവാഹം കഴിഞ്ഞുവെന്ന തരത്തിൽ പ്രചരണങ്ങൾ ശക്തമായി.
എന്നാൽ വിവാഹ വാർത്ത നിഷേധിച്ചിരിക്കുകയാണ് സംഗീത സംവിധായകൻ ഗോപി സുന്ദർ. വിവാഹം കഴിഞ്ഞിട്ടില്ലെന്നും പഴനിയിൽ വെച്ച് മുമ്പെടുത്ത ചിത്രങ്ങളാണ് ഇൻസ്റ്റഗ്രാമിൽ പങ്കുവെച്ചതെന്നും ഗോപി സുന്ദർ പ്രതികരിച്ചു.
നേരത്തെയും ഇരുവരും തമ്മിലുള്ള വിവാഹം കഴിഞ്ഞുവെന്ന രീതിയിൽ വ്യാജവാർത്തകൾ പ്രചരിച്ചിരുന്നു. ക്ഷേത്രസന്ദർശനത്തിനിടെ രണ്ടുപേരും ഹാരമണിഞ്ഞ് നിൽക്കുന്ന ചിത്രങ്ങൾ പുറത്തുവന്നതോടെയാണ് വിവാഹം കഴിഞ്ഞതായി വാർത്ത പ്രചരിച്ചത്. അന്നും ഇരുവരുടെയും വിവാഹം കഴിഞ്ഞുവെന്ന രീതിയിൽ സോഷ്യൽമീഡിയയിൽ ചർച്ചയുണ്ടായി.
ഏതാനും മാസങ്ങൾക്ക് മുമ്പാണ് അമൃതയും ഗോപി സുന്ദറും പ്രണയത്തിലാണെന്ന് ഇരുവരും വെളിപ്പെടുത്തിയത്. ജീവിതത്തിലെ വിഷമകരമായ ഘട്ടങ്ങൾ പിന്നിട്ട് ഒരുമിച്ചൊരു മനോഹര യാത്ര ആരംഭിക്കുകയാണെന്നും ആരാധകരുടെ പിന്തുണയും പ്രാർത്ഥനയും ഉണ്ടാകണമെന്നും അമൃത സുരേഷ് പറഞ്ഞു. ഇതിന് പിന്നാലെ ഇരുവരും സമൂഹമാദ്ധ്യമങ്ങളിൽ പങ്കുവെക്കുന്ന ചിത്രങ്ങൾ വലിയ പ്രേക്ഷകശ്രദ്ധ നേടുകയും ചർച്ചയാകുകയും ചെയ്തിരുന്നു.
