ന്യൂഡൽഹി: ഇന്ത്യയുടെ പതിനഞ്ചാമത് രാഷ്ട്രപതിയായി തിരഞ്ഞെടുക്കപ്പെട്ട ദ്രൗപദി മുർമുവിന് വിവിധ കോണുകളിൽ നിന്നും അഭിനന്ദന പ്രവാഹം. ഇന്നത്തെ ദിവസം രാജ്യത്തിന്റെ ചരിത്രത്തിൽ സുവർണ ലിപികളിൽ രേഖപ്പെടുത്തേണ്ട സുദിനമാണെന്ന് കേന്ദ്ര മന്ത്രി പിയൂഷ് ഗോയൽ. ദ്രൗപദി മുർമുവിന് ഹൃദയംഗമമായ അഭിനന്ദനങ്ങൾ അറിയിക്കുന്നുവെന്ന് അദ്ദേഹം പറഞ്ഞു.
പ്രധാനമന്ത്രി നമ്മുടെ രാജ്യത്തിന്റെയും വനവാസി സമൂഹത്തിന്റേയും അഭിമാനം ഉയർത്തിയതായി പിയൂഷ് ഗോയൽ പറഞ്ഞു. രാജ്യത്തെ എല്ലാ വിഭാഗം ജനങ്ങൾക്കും തങ്ങളുടെ സ്വത്വത്തിൽ അഭിമാനിക്കാവുന്ന കാര്യങ്ങളാണ് രാജ്യത്ത് നടപ്പിലാകുന്നത്. പിയൂഷ് ഗോയൽ പറഞ്ഞു.
രാഷ്ട്രീയവും സാമൂഹികവും സാമ്പത്തികവും എന്ന് മാത്രമല്ല, സമസ്ത മേഖലകളിലും ഇന്ത്യയുടെ പുരോഗതി ത്വരിതപ്പെടുത്താൻ ഈ പുതുചരിത്രത്തിന് സാധിക്കും. രാജ്യം മുഴുവൻ ഇന്ന് ദ്രൗപദി മുർമുവിന്റെ വിജയം ആഘോഷിക്കുകയാണ്. വരാനിരിക്കുന്ന കാലത്തിലും ഓർത്തിരിക്കപ്പെടുന്ന ചരിത്രപരമായ സന്ദേശമാണ് ദ്രൗപദി മുർമുവിന്റെ വിജയത്തിലൂടെ പ്രധാനമന്ത്രി നരേന്ദ്ര മോദി നൽകിയിരിക്കുന്നതെന്നും കേന്ദ്ര മന്ത്രി പിയൂഷ് ഗോയൽ പറഞ്ഞു.
